2013-2014 ուսումնական տարում Երևանի քաղաքապետարանի ենթակայությամբ գործող 159 դպրոցում և մանկապարտեզներում սպասվող ընդունելության ցուցանիշները չեն զիջում նախորդ տարվա ցուցանիշներին:Այս մասին այսօր լրագրողների հետ հանդիպման ժամանակ պատասխանելով «Առաջին լրատվական»-ի հարցին՝ ասաց քաղաքապետարանի կրթության վարչության պետ Գայանե Սողոմոնյանը:
Նրա խոսքով՝ անցած տարի սեպտեմբերին առաջին դասարան է հաճախել մոտ 11 հազար 616 աշակերտ, իսկ այս տարի դեռ օգոստոսի 22-ի դրությամբ արդեն իսկ առկա է 10 հազար 500 աշակերտի անձնական գործ, և ընդունելությունը շարունակվելու է մինչև սեպտեմբերի 5-ը ներառյալ: Սողոմոնյանի խոսքով՝ ակնկալվում է, որ սեպտեմբերի 5-ի դրությամբ ավելի մեծ թիվ կլինի, քանի որ վերջին օրերին ծնողները վերադառնալով հանգստից` ակտիվորեն լծվում են երեխային դպրոց տեղավորելու գործին:
Ինչ վերաբերում է մանկապարտեզներին, ապա նախատեսվում է, որ այս ուստարում մոտ 8 հազար երեխա կընդունվի, քանի որ նախորդ տարի այդքան թվով երեխա է ավարտել մանկապարտեզը և գնալու է դպրոց: «Մենք հիմա հստակ կարող ենք ասել, որ 8 հազար երեխա ընդունվելու է, բայց հետագայում ևս ընդունելությունը շարունակվելու է, որի մասին առայժմ հստակ թիվ ասել չեմ կարող, քանի որ ընդունելությունն անընդհատ գործընթաց է»,- ասաց Սողոմոնյանը:
Քաղաքապետարանի կրթության վարչության պետը «Առաջին լրատվական»-ի խնդրանքով անդրադարձավ նաև մանկապարտեզների գերբեռնվածության խնդրին և տարիներ շարունակ հերթագրված ու իրենց հերթին սպասող երեխաների ընդունելությանը: «Մենք ընդունում ենք, որ այդպիսի խնդիր կա և շատ մտահոգվում ենք այդ մասով: 2013-2014-ին քաղաքապետի հրամանով մենք լրացուցիչ ևս 1500 երեխա ընդունեցինք, տարբեր մանկապարտեզներում նոր խմբեր բացվեցին»,- ասաց նա՝ հավելելով, որ խնդիրն առաջացել է այն պատճառով, որ մանկապարտեզների շենքերը զբաղեցված են այլ կառույցների, կազմակերպությունների կողմից:
«Ես բազմիցս եմ ասել, որ Երևանի քաղաքապետարանը 90-ական թվականներից դաժան ժառանգություն է ստացել: Մենք մանկապարտեզներ ունենք, որտեղ հսկայական տարածքներ վարձակալությամբ են տրված անհատույց, 30 կամ 50 տարով, մինչև 2050 թվականը: Մենք հիմա դրանք չենք կարող հետ վերցնել, քանի որ կա փաստաթուղթ, օրինական, իրավաբանորեն ձևակերպված: Մենք հիմա ոչինչ չենք կարող անել: Սա է խնդիրը»:
Խոսելով այլընտրանքային մեխանիզմների մասին՝ Սողոմոնյանը նկատեց, որ իրենք մեխանիզմներ անընդհատ են մշակում: «Այլընտրանքային տարբերակներ են նոր խմբեր բացելը, թվով 11 կենտրոնների բացելը: Ես պետք է նշեմ մի շատ կարևոր փաստ, որ աշխարհի որևէ երկրում չկա անվճար մանկապարտեզ, և հայտնի է, որ գերբեռնվածության հարցն առաջ եկավ, երբ Երևանի մանկապարտեզներն անվճար դարձան»,- նկատեց կրթության վարչության պետը:
Տիկին Սողոմոնյանից հետաքրքրվեցինք՝ ինչպե՞ս են վերահսկում, որպեսզի մանկապարտեզների գերբեռնվածության այս պայմաններում բացառեն կամ նվազագույնի հասցնեն կոռուպցիոն ռիսկերը, որպեսզի մանկապարտեզի տնօրենները «մաղարիչ» չվերցնեն երեխաներին հերթագրումից ավելի շուտ ընդունելու համար: «Մենք մտահոգ ենք ձեր բարձրացրած հարցով, բայց չունենք որևէ հիմք, որ հավատամ ձեզ: Եթե դուք կբերեք որևէ մի օրինակ, որ կոնկրետ մի մանկապարտեզում կա նման երևույթ, ապա ես պաշտոնապես եմ փաստում, որ դեպքը կդատապարտվի ամենախիստ ձևով: Բայց ես հակված եմ մտածելու, որ դրանք բամբասանքներ են»,- ասաց Գայանե Սողոմոնյանը:
Լուսանկարը՝ Pan Photo-ի
