Պակիստանի պաշտպանության նախարար Խավաջա Մուհամմադ Ասիֆը հայտաարել է, որ Պակիստանի ներքին կամ արտաքին և ոչ մի ուժ չի ստիպի երկրին կրկնել Իրաքի կամ Սիրիայի ճակատագիրը: Այս մեկնաբանությունները հնչել են Իսլամաբադում շարունակվող բազմահազարանոց խաղաղ նստացույցի ֆոնին, որի մասնակիցները տեղավորվել են Խորհրդարանի ներքին պալատի շենքի մուտքի դիմաց, գրում է ITAR-TASS-ը:
Մի քանի ժամ առաջ Ազգային ասամբլեայի պատգամավորները միաձայն կողմ են քվեարկել երկրի սահմանադրության գերակայությանը:
Խորհրդարանականները մերժել են բողոքի ակցիայի կազմակերպիչների՝ «երկրի հիմնական օրենքին հակազդող պահանջները, որոնք են՝ Պակիստանի վարչապետ Նավազ Շարիֆի կամավոր հեռացում և ներքին պալատի ցրում, որտեղ մեծամասնությունը Նավազի կուսակցության անդամներն են:
«Սկզբունքային պահը, իմ կարծիքով, այն է, որ մեր երկրի պատմության մեջ առաջին անգամ պետական իշխանության բոլոր օրգանները, այդ թվում նաև պակիստանյան բանակը, կառավարությանը հավատացրել են իսլամական հանրապետության սահմանադրությունը պահպանելու մասին և հիմնական օրենքին կողմ են արտահայտվել»,- ընդգծել է Ասիֆը:
«Վարչապետը և Փենջաբ նահանգի գլխավոր նախարարը ոչ մի դեպքում չեն լքի իրենց պաշտոնները»,- շարունակել է նա: Ինչու պետք է նրանք դա անեն մի կուսակցության պահանջով, որը խորհրդարանի ներքին պալատում ընդամենը 35 տեղ է ստացել (272 հնարավորից):
Պաշտպանության նախարարը տեղի և արտասահմանյան լրագրողներին հայտնել է, որ բողոքի ակցիայի կազմակերպիչներից մեկը՝ պակիստանա-կանադացի քաղաքացի Թահիր Կադրին, «գործում է արտասահմանյան ուժերի աջակցությամբ, որոնք վերջնական արդյունքում ձգտում են չեզոքացնել կամ տիրել Պակիստանի միջուկային պոտենցիալին: «Հիշեցնում եմ, որ մեր երկիրը միակ իսլամական պետությունն է, որը միջուկային զենք ունի,-հայտարարել է նա: -Եվ մենք ոչ ոքի թույլ չենք տա այստեղ իրաքյան կամ սիրիական ներկայացումների պես մի բան բեմադրեն»:
