Թուրքիայի ազգային հետախուզական վարչության ղեկավար Հաքան Ֆիդանը Քուրդիստանի աշխատավորական կուսակցության (ՔԱԿ) ղեկավար Աբդուլլահ Օջալանի հետ քննարկել է քրդական կարգավորման հարցերը: Հանդիպումը տեղի է ունեցել անցած շաբաթավերջին Իմրալի կղզու բանտում, որտեղ Օջալանը ցմահ բանտարկված է, հայտնում է ITAR-TASS-ը՝ հղում անելով տեղի ԶԼՄ-ներին:
Դա եղել է թուրքական հետախուզության ղեկավարի առաջին հանդիպումը Քուրդիստանի աշխատավորական կուսակցության ղեկավարի հետ երկրում օգոստոսի 10-ին տեղի ունեցած նախագահական ընտրություններից հետո: Մինչ այդ Ֆիդանն անձամբ մի քանի անգամ հանդիպել է Օջալանի հետ, բացի դրանից՝ հետախուզության այլ աշխատակիցներ ևս նրա հետ քննարկել են նորմալացման հեռանկարները:
Կառավարությունը հույս ունի, որ մինչև սեպտեմբերի վերջ կարգավորումը կմտնի վերջնական փուլ, որը ներառում է Թուրքիայից ՔԱԿ զորքերի վերջնական դուրսբերում, զինյալներին ընտանիքներին վերադարձ, եթե նրանք չեն մասնակցել հարձակումներին, նրանց նորմալ սոցիալական կյանք ինտեգրում:
ՔԱԿ-ի զինաթափման հեռանկարն առայժմ պարզ չէ: Միաժամանակ նշվում է, որ 2013-ի սկզբից և վերջին 30 տարում առաջին անգամ ծայրահեղական կուսակցության և կառավարության հարաբերությունները մտել են խաղաղ շրջան, զինված դեպքերը և հարձակումները գործնականում լիովին նվազագույնի են հասցվել:
