Վերջերս ծեծելով ազատամարտիկ Վարդան Թումանյանին սպանած Ջունգլի՝ Գևորգ Սարգսյանի քույրը օրերս գնացել է Նոր Նորքի 7-րդ զանգվածի համատիրություն, որտեղ աշխատում է Վարդանի քույրը, և ապրում է նրա ընտանիքը, ու հայտարարել, որ ինքն այնտեղից չի հեռանա, մինչև հաշվեհարդար չտեսնի Վարդանի ընտանիքի անդամների հետ, քանի որ նրանք փորձում են իր եղբորը և մյուս հարազատներին բանտ նստեցնել:
Վարդան Թումանյանի քրոջ՝ տիկին Մարիետայի խոսքերով, նման քայլերը պրովոկացիա են: «Նրանք պորովոկացիա են անում, մտածում են, որ նման քայլերով կարող են մեզ հունից հանել, մենք էլ մի այնպիսի բան անենք, որ ամեն ինչ լրիվ ուրիշ ուղղությամբ գնա, գործը շուռ տան ուրիշ ուղղությամբ, բայց մենք դեռ դիմադրում ենք»,- «Առաջին լրատվական»-ի հետ զրույցում ասաց տիկին Մարիետան՝ հավելելով, որ գործից դեռ առանձնապես նորություն չկա, նախաքննություն է ընթանում, ընտանիքի անդամներին լրացուցիչ հարցաքննության չեն կանչել, իսկ ծեծին մասնակցած և հետախուզման մեջ գտնվող տղաներից մեկը դեռ հետախուզման մեջ է:
Տիկին Մարիետայի խոսքերով նման պրովոկացիաներ հրահրում է նաև ընտանիքի հայրը՝ իրեն ազատամարտիկ հռչակած Բաբկեն Սարգսյանը: «Դուրս են գալիս, ազատ ման են գալիս, որ մեզ հունից հանեն: Իրեն ազատամարտիկի տեղ է դրել, Երկրապահի անդամ է, բայց նա ոչ մի կռվի չի մասնակցել: Կռվի ժամանակ Ախալքալաքում պանիր է վաճառել, իսկ երբ կռիվը վերջացել է՝ եկել է, կեղծ թղթեր հանել, մարտական ուղի է ներկայացրել ու դարձել Երկրապահի անդամ»:
Տիկին Մարիետան նաև ցավով նշեց, որ պատկան մարմինները, նույն Երկրապահը որևէ ձևով այս օրերին չեն աջակցում Վարդանի ընտանիքին: Առանձին մարտական ընկերներ իրենց օգնությունը ցուցաբերում են, փաստաբան են վարձել, բայց ընդհանուր առմամբ քար անտարբերություն է:
Օրերս էլ Վարդանի կինը գնացել է սոցապծառայություն՝ մտածելով, որ ընտանիքի հիմնական կերակրողին կորցնելուց հետո իրեն գոնե ինչ-որ թոշակ կամ նպաստ կնշանակեն, սակայն նրան մերժել են: Նշենք, որ ամուսնուն կորցնելուց բացի, տիկին Տանյան խնամում է նաև մանկուց հաշմանդամ երեխային, որին ևս որևէ օգնություն չի ցուցաբերվում: «Այսինքն՝ ամեն տեղից այս ընտանիքի համար բոլոր դռները փակված են»,- նկատեց տիկին Մարիետան:
