Շոտլանդիայում աճում է անկախության կողմնակիցների թիվը: Մեծ Բրիտանիայից առանձնանալու հարցով հանրաքվեից մեկուկես ամիս առաջ սոցհարցումները ցույց են տալիս, որ շոտլանդացիների ավելի քան 40%-ն ինքնավարություն է ուզում, հայտնում է «Ռոսիա 24» հեռուստաալիքը: Միաժամանակ, շոտլանդացիների 54%-ն ուզում է մնալ Միացյալ Թագավորության կազմում, և միայն 6%-ը դեռ վերջնական որոշում չի ընդունել:
Նախօրեին Գլազգոյում անցկացվել են առաջին հեռուստաբանավեճերը: «Ավելի լավ է միասին» միավորման ղեկավար Ալիսթեր Դարլինգը հիշեցրել է Մեծ Բրիտանիայի հետ դարավոր համագործակցության մասին: Իսկ Շոտլանդիայի կառավարության առաջին նախարարը պնդում է, որ երկիրը լիովին ինքնուրույն է բոլոր ցուցանիշներով: Ինքնիշխանության կողմնակիցներին չեն համոզում նաև Շոտլանդիայի խորհրդարանի լիազորություններն ընդլայնելու Բրիտանիայի իշխանությունների խոստումները, մասնավորապես, եկամտահարկն ինքնուրույն սահմանելու վերաբերյալ:
Հաջորդ բանավեճերը տեղի կունենան Շոտլանդիայի անկախության վերաբերյալ հանրաքվեից մեկ օր առաջ: Քվեարկությունը նշանակված է սեպտեմբերի 18-ին:
