Ազգային ժողովի ՀՀԿ խմբակցության պատգամավոր Շուշան Պետրոսյանն «Առաջին լրատվական»-ի հետ զրույցում անդրադարձավ օրերս մամուլում հայտնված այն հրապարակմանը, որ ՀՀ նախագահի աշխատակազմի ղեկավար Վիգեն Սարգսյանն իրեն փոխանցել է Սերժ Սարգսյանի հորդորը՝ «Կա՛մ մանդատդ, կա՛մ սկզբունքներդ ու համոզմունքներդ», նաև այն հարցին, որ իրեն կողմնորոշվելու ժամանակ են տվել՝ մինչև աշնանային նստաշրջան այս հարցում վերջնական հստակություն մտցնելու:
«Իսկապես նման բան չի եղել, աբսուրդ է, ես հիմա Ղարաբաղում երանելի վիճակներում եմ, նախագծեր ենք իրականացնում, տեսնես՝ ո՞վ է խառնվել իրար և ինչո՞ւ: Նախագահի հետ չկա նման պայմանավորվածություն, ինչպե՞ս կարող է նման բան լինել»,- ասաց Շուշան Պետրոսյանը:
Նա նշեց, որ Վիգեն Սարգսյանի հետ հարաբերությունները շատ նորմալ են, շատ բարեկիրթ, ավելին՝ Վիգտեն Սարգսյանը իրեն շատ է օգնել Ղարաբաղում իրականացվելիք ծրագրերի հարցերում. «Հակառակը, վերջերս զանգեց հարցրեց՝ ինչպե՞ս են գործերը Ղարաբաղում, քանի որ ես իրազեկ եմ պահում»:
Հետաքրքրվեցինք՝ ի՞նչ ծրագրեր է իրականացնում Շուշան Պետրոսյանը Ղարաբաղում: Նա նշեց, որ մինչև սեպտեմբերի 2-ը կավարտվեն Մարտակերտի կենտրոնում մշակութային կենտրոնի վերականգնման աշխատանքները: Նրա խոսքով՝ մշակութային կենտրոնը ծառայելու է 71 գյուղերի. «Ես մեծ ծրագիր ունեմ, Մարտակերտի շրջկենտրոնի մշակութային կենտրոնը վերականգնելուց հետո անցնել Մարտակերտի շրջանի Հաթերք և Վաղուհաս գյուղերի մշակույթի տներին, որոնք շատ լավ վերանորոգված են, բայց չեն ապրում, չեն ապրեցվում: Ինձ համար առաջնային է, որպեսզի ճիշտ աշխատեն կենտրոնները: Իմ երազանքները, իմ հոգսերը և ինչ-որ թեմաներ, որ բնավ կապ չունեն իրականության հետ: Հանգիստ թող նստեն իրենց տեղը»,- ասաց երգչուհին:
Մամուլում շրջանառվող այն լուրը, թե ինքը չի ցանկացել պատասխանել հարցին՝ ասելով, որ իր հանգիստը չի խանգարի այդ հարցին պատասխանելու համար, և հարցը թողել է անպատասխան, երգչուհին հերքեց. «Ընդամենը Աղդամով անցնելիս անհասանելի եմ եղել: Չէր լսվում ոչինչ, մինչդեռ ասում են, որ ես թեման լսել եմ և հերքել»:
Արդյոք հե՞շտ է գումար գտնել նման կառույցներ վերականգնելու համար՝ հարցին ՀՀԿ-ական պատգամավորը պատասխանեց. «Եթե գայթակղվելու վախ չունես և գիտես, որ կոնկրետ կոնցեպցիա կա, որը դու ստեղծում ես քո գլխում և սկսում ես ծառայել այդ կոնցեպցիային, այդ գաղափարին, այնքան հեշտ է ծառայել և ծառայեցնել ամեն ինչ կոնկրետ այդ գաղափարի իրագործմանը. առանց մտածելու քո անձի մասին՝ մտածում ես գաղափարի մասին: Մարտակերտը փայլուն օրինակ է, թե ինչպես կարելի է կոնկրետ նախագծեր ստեղծել և ամեն ինչ, որ հատկացված է նախագծի համար, աշխատեցնել հօգուտ նախագծի և ստանալ արդյունք»:
Շուշան Պետրոսյանից հետաքրքրվեցինք նաև՝ նախագահականից կամ ՀՀԿ-ի՞ց են հուշում՝ որ օրինագծին կողմ կամ դեմ քվեարկել, ի պատասխան ՀՀԿ-ական պատգամավորն ասաց. «ՀՀԿ-ում նման բան չկա, ՀՀԿ-ն այդ առումով միշտ հարգում է իր կուսակիցների կարծիքը, և երբևէ նման ճնշում ինձ վրա չեմ զգացել: Գուցե շատերի համար անհասկանալի է, բայց եղել է առիթ, երբ ես տեսել եմ՝ դահլիճում ինչպես են այս կամ այն կուսակցության ղեկավարները հրամայում՝ հիմա չենք քվեարկում, հիմա էս ենք անում, և տարօրինակ է, որ թիրախը դառնում է Հանրապետական կուսակցությունը, բայց ես կողքից նայում եմ և տեսնում, որ այդ ամենը ոչ մի կապ չունեն ՀՀԿ-ի հետ»:
