Երեկ երեկոյից սկսած Հայաստանի ամբողջ տարածքում խափանվել է Ucom ընկերության ինտերնետ կապը, որի պատճառով կաթվածահար է եղել ինտերնետի հետ կապված բոլոր ընկերությունների աշխատանքը: Կապի խափանման պատճառը, ըստ ընկերության, այն է, որ Բագրատաշենի սահմանակետով դեպի Վրաստան գնացող Ucom ընկերության հիմնական մալուխներից երկուսը Վրաստանի տարածքում մի քանի տեղից վնասվել են: Ընկերությունից փոխանցեցին, որ իրենց մասնագետներն աշխատում են վթարը վերականգնելու համար, սակայն, չեն կարող ասել, թե որքան ժամանակ կպահանջվի դրա համար, և կոնկրետ երբ կվերականգնվի կապը:
«Շնորհիվ պահուստային գծերի՝ մեր ինտերնետ բաժանորդները ներկա պահին հիմնականում ապահովված են ինտերնետ հասանելիությամբ, իսկ Վրաստանի Հանրապետության տարածքում այժմ Ucom ընկերության և վրացական կողմի մասնագետների կողմից վերանորոգման աշխատանքներ են կատարվում»,- փոխանցեցին ընկերությունից՝ հավելելով, որ իրենք արդեն դիմել են վրացական կողմին՝ մալուխների վնասման պատճառների բացահայտման խնդրանքով:
Կապի խափանման պատճառով բարձրացված աղմուկը մեծ է, քանի որ Ucom-ը ամենամեծ տարածվածությունն ունի հանրապետության տարածքում և ապահովում է ամենաարագ ինտերնետը: Այլընտրանքային կապեր կան, սակայն չեն ապահովում այն արագությունը, ինչ այս կապը:
Ինֆորմացիոն տեխնոլոգիաների և ձեռնարկությունների միության գործադիր տնօրեն Կարեն Վարդանյանը, սակայն, կարծում է, որ սա Ucom ընկերության խնդիրը չէ, սա ազգային անվտանգության խնդիր է, և պատասխանատուն տրանսպորտի և կապի նախարարությունն է, որը հասկանալի չէ, թե ինչով է զբաղված:
«Կապ է, մալուխ է, և ենթադրենք՝ ինչ-որ մեկը մկրատն առած գնաց ու կտրեց այդ մալուխը: Մասնավոր ընկերությունն ինչպե՞ս կարող է պատասխանատվություն կրել, ի՞նչ կապ ունի ընկերությունը: Ազգային անվտանգության համար պատասխանատվություն կրում է կապի նախարարը, որը պետք է զբաղվի, որ գծերը դիվերսիֆիկացվեն, դիվերսիֆիկացված կապ պետք է ունենանք, ներսում անտենաներ աշխատեն, որոնք կապ չունենան օպտիկայի հետ և այլն, և այլն: Հազար ձև կա այդ հարցը լուծելու համար:
Իրական թիրախը, կրկնում եմ, կապի նախարարությունն է, և եթե վաղը-մյուս օրը կռիվ սկսվեց, եթե բոլոր կապերը վնասվեցին, ի՞նչ ենք անելու: Կապի նախարարության անգործության պատճառով ազգային անվտանգության խնդիր կարող է առաջանալ»,- «Առաջին լրատվական»-ի հետ զրույցում ասաց Կարեն Վարդանյանը:
Կապի նախարարությունից խոստացել են պատասխանել մեզ, թե ինչ աշխատանքներ են տանում խափանված կապը վերականգնելու համար, և որքան է իրենց պատասխանատվության բաժինը:
