Եգիպտոսի նոր Սահմանադրության համազգային հանրաքվեն կկայանա դեկտեմբերի 15-ին: Այս մասին հաղորդել է Եգիպտոսի նախագահ Մուհամեդ Մուրսին:
Այսօր ավելի վաղ նրա ստորագրությանն է հանձնվել երկրի Հիմնական օրենքի նախագիծը, որը նախօրեին հաստատվել էր Սահմանադրական դատարանի անդամների կողմից: Քաղաքացիների կողմից հավանության արժանանալու դեպքում այն ուժի մեջ կմտնի:
Հուսամ ալ-Գարյանի ղեկավարությամբ հանդիսավոր արարողությունը` հանձնաժողովի 85 անդամների մասնակցությամբ, այժմ ընթանում է Եգիպտոսի մայրաքաղաքի կոնֆերանսների սրահում:
«Ժողովրդին խնդրում ենք հավանության արժանացնել Սահմանադրության նախագիծը, որը ներառում է այն իրավունքներն ու ազատությունները, որոնք նախկինում չեն ընդգրկվել եգիպտական որևէ սահմանադրությունում»,- հայտարարել է ալ-Գարյանը:
Միաժամանակ Կահիրեի համալսարանի շենքի մոտ են հավաքվել նախագահի հարյուր հազարավոր կողմնակիցներ, ովքեր ոչ միայն աջակցում են նոր Սահմանադրությունը, այլև կողմ են Եգիպտոսում շարիաթի կանոնների կիրառմանը: Իսլամիստները հայտարարել են, որ ամբողջ երկրով մեկ կարողացել են հավաքել շուրջ 15 մլն կողմնակիցների, սակայն արաբական հեռուստաալիքները հաղորդում են, որ նրանց թիվը չի գերազանցում 1 մլն-ը:
