ԱՄՆ Կոնգրեսի Ներկայացուցիչների պալատը հաստատել է մի օրինագիծ, որը հեշտացնում է կեցության իրավունք ստանալն այն օտարերկրացի ուսանողների համար, որոնք ավարտել են ԱՄՆ-ի բարձրագույն ուսումնական հաստատություններ` մաթեմատիկայի և նոր տեխնոլոգիաներ ոլորտների մասնագիտությամբ:
Կոնգրեսականներն այս որոշումը կայացրել են ԱՄՆ-ում բարձրագույն տեխնոլոգիաների ոլորտը խթանելու համար: Նախագիծը պետք է հաստատի Սենատը, որը հավանաբար դա կանի հաջորդ տարի` բյուջեի հարցերով խիստ զբաղվածության պատճառով: Ակնկալվում է, որ 2013թ. Կոնգրեսի գլխավոր թեման լինելու է ԱՄՆ-ի ներգաղթի քաղաքականությունը:
Ավելի վաղ հանրապետական սենատորներ Ջոն Քայլը և Քե Բեյլի Հաթչիսոնն իրենց տարբերակն էին առաջարկել անօրինական ներգաղթի խնդիրները լուծելու համար: Նրանց նախագծի համաձայն` անօրինական ներգաղթյալների երեխաները կարող են կեցության իրավունք ստանալ, այսպես կոչված` «կանաչ քարտ», այլ ոչ թե քաղաքացիություն:
Հունիսին ԱՄՆ վարչակազմը հայտարարեց երկարատև սպասված օրենսդրության մեղմացման մասին անօրինական ներգաղթյալների համար, որոնք ԱՄՆ էին տեղափոխվել փոքր հասակում: Ներգաղթյալներին թույլատրվում է մնալ ԱՄՆ-ում, եթե նրանք համապատասխանում են հինգ չափանիշների. ԱՄՆ-են ժամանել մինչև 16 տարեկան հասակը, մինչև տվյալ պահն ապրել են ԱՄՆ-ում առնվազն հինգ տարի, սովորում են դպրոցում կամ ավարտել են այն, կամ ստացել են միջին կրթության փաստաթուղթ, եղել են զինծառայող, չեն կատարել որևէ հանցագործություն և նրանց տարիքը չի գերազանցում 30-ը:
