Ռուսական Ria Novosti լրատվական գործակալության փոխանցմամբ` Ռուսաստանի էներգետիկայի նախարար Ալեքսանդր Նովակը թուրք լրագրողների հետ զրույցում հայտարարել է, որ պլանավորված չէ «Հարավային հոսք» գազատարի նախագծում Թուրքիայի մասնակցությունը: Այդ գազատարը պետք է անցնի Սև ծովի հատակով և ռուսական գազը հասցնի Եվրոպա:
Նովակը հայտարարել է. «Մենք շատ շնորհակալ ենք, որ Թուրքիան 2011 թվականի ավարտին թույլ տվեց Սև ծովի իր բացառապես տնտեսական գոտում «Հարավային հոսք» գազատարի խողովակաշարի անցկացումը: Ինչ վերաբերում է բուն գազատարի կառուցմանը, ապա դեռ նախատեսված չէ դրանում թուրքական կողմի մասնակցությունը: Պլանավորված է «Հարավային հոսք» գազատարի կառուցումը սկսել դեկտեմբերի 7-ին»:
Գազատարն ունենալու է չորս ճյուղ, որոնցից յուրաքանչյուրն ունենալու է մոտ 15.75 միլիարդ խորանարդ մետր թողունակություն: Նախագիծն ամբողջովին իրագործվելու է 2018 թվականին, երբ խողովակաշարի տարեկան թողունակությունը կկազմի 63 միլիարդ խորանարդ մետր: Գազատարի նախագծի արժեքը 16 միլիարդ եվրո է:
