Թուրքական Akşam թերթի փոխանցմամբ՝ Anonymous ցանցահենային խումբը ոչ վաղ անցյալում հարձակում էր գործել Սիրիայի ԱԳՆ-ի էլեկտրոնային նամակագրության վրա և արժեքավոր տեղեկություններ առևանգել հոկտեմբերի 11-ին Անկարայի «Էսենբողա» օդանավակայանում Մոսկվայից Դամասկոս մեկնող սիրիական ինքնաթիռին հարկադիր վայրէջք պարտադրելու վերաբերյալ:
Anօnymous-ը գաղտնազերծել է «Սիրիայի ավիաուղիներ» ընկերության կողմից Օդային հաղորդակցության միջազգային կազմակերպությանը և «Արաբական ավիաուղիներ» կազմակերպությանն ուղարկված նամակները, որոնցում Թուրքիային մեղադրել է օդային ծովահենության մեջ:
Anonymous-ը հրապարակել է այդ միջադեպի վերաբերյալ 7 էջանոց զեկույց, որի կեսն անգլերեն է, իսկ մյուս կեսը՝ արաբերեն: Այդ զեկույցում ասվում է, որ Թուրքիայի ռազմաօդային ուժերի F-16 կործանիչները առանց որևէ նախազգուշացման հարկադիր վայրէջք են պարտադրել քաղաքացիներին տեղափոխող այդ ինքնաթիռին:
F-16 կործանիչները սիրիական ինքնաթիռին մոտեցել են մինչև 50 մետր, որով և վտանգել են ինքնաթիռում եղած քաղաքացիական անձանց կյանքը: Մարդատար ինքնաթիռի օդաչուն երբ հարցրել է, թե ինչու են հարկադիր վայրէջք պարտադրում ինքնաթիռին, թուրք դիսպետչերները պատասխանել են, որ տեղյակ չեն:
Ինքնաթիռի վայրէջքից հետո թուրքական անվտանգության աշխատակիցները մուտք են գործել ինքնաթիռ և մեծ խուճապ են առաջացրել ուղևորների շրջանում: Նրանք զենքերը պահել են ուղևորների վրա և ստիպել իջնել ինքնաթիռից: Դրանից հետո ինքնաթիռը 7 ժամ խուզարկվել է, իսկ ուղևորները գտնվել են հոգեբանական վատ վիճակում:
