«Ներքին ընդդիմությունը պատրաստ է Սիրիայի քաղաքական վարչակարգի փոխվելու վերաբերյալ բանակցություններ վարել երկրի իշխանությունների հետ». այս մասին հայտարարել է Ազգային կոորդինացիոն կոմիտեի (ԱԿԿ) գլխավոր կոորդինատորի տեղակալ Արեֆ Դալիլյան,- փոխանցում է ITAR-TASS-ը:
«Մենք պատրաստ ենք ոչ թե երկխոսության, այլ բանակցությունների Սիրիայի իշխանությունների հետ, որոնց ժամանակ կքննարկվի քաղաքական վարչակարգի փոխվելը»,- ասել է նա՝ Մոսկվա ժամանելով, որտեղ այսօր նախատեսված է ԱԿԿ-ի պատվիրակության հանդիպումը ՌԴ ԱԳՆ ղեկավար Սերգեյ Լավրովի հետ:
ԱԿԿ ղեկավար Հասան Աբդել Ազիմն իր հերթին ասել է, որ կոմիտեն ուզում է արմատապես փոխել Սիրիայի գործող վարչակարգը` նորը՝ ժողովրդավարականը կառուցելու համար: «Մենք պնդում ենք, որ հեղափոխությունը խաղաղ լինի, և դադարեցվի արյունահեղությունը,- շարունակել է Ազիմը:- Կոմիտեն միշտ փորձել է միավորել ընդդիմությանն այդ սկզբունքների հիման վրա»: Նա նշել է, որ կտրականապես դեմ է Սիրիա արտաքին զինված միջամտությանը:
«Հիմա անհրաժեշտ է, որպեսզի հակամարտության հետ կապ ունեցող բոլոր կողմերը` ՄԱԿ-ի Անվտանգության խորհուրդը, Արևմուտքը, Ռուսաստանը, Չինաստանը, ԱՊԼ-ն, բոլորը համագործակցեն և միաժամանակ հարթեն Սիրիայի հարցում միմյանց միջև եղած հակասությունները` Սիրիայում ռազմական գործողությունները դադարեցնելու համար, և սկսեն կատարել Ժնևյան կոմյունիկեն»,- ասել է նա:
