Հնդկաստանի ոստիկանությունը բացահայտել է մանկապիղծների մի ամբողջ ընտանիք, որը երկու տարվա ընթացքում տանջել է իր անչափահաս արյունակցին: Իսկ տուժածի ավագ քույրը, չդիմանալով տանջանքներին, ինքնասպանություն է գործել դեռ մի քանի տարի առաջ:
Ինչպես հաղորդում է NDTV հեռուստաալիքը, սարսափելի հանցագործությունը տեղի է ունեցել Կանուր քաղաքում, որտեղ 13-ամյա աշակերտուհուն բռնաբարել են իր ընտանիքի անդամները:
Երեքշաբթի ոստիկանությունը ձերբակալել է աղջկա հորն ու հորեղբորը: Երրորդ կասկածյալը աղջկա 15-ամյա եղբայրն է, որին տարել են անչափահասների համար մեկուսարան:
Ավելին, գործում կարող է ի հայտ գալ ևս մեկ մարդ. ոստիկանությունն այժմ ստուգում է աղջկա մյուս հորեղբորը: Ըստ քննիչների տվյալների՝ հարազատները երկու տարվա ընթացքում աղջկան ենթարկել են սեռական բռնության:
Առաջինը ընտանիքում տիրող բռնաբարությունների մասին իմացել են ուսուցիչները, որոնց վստահել է երեխան: Ուսուցիչները սարսափեցնող նորությունը հայտնել են ոստիկանությանը:
Սկսված հետաքննության ընթացքում պարզ է դարձել, որ երկու տարի առաջ մահացել էր աղջկա ավագ քույրը: Աշակերտուհու խոսքերով՝ նա ինքնասպան է եղել, որովհետև ևս բռնաբարությունների է ենթարկվել հարազատների կողմից:
Տուժածի ընտանիքը աղքատ է ապրում: Նրա մայրը հայտնել է, որ աշխատում է և ոչնչից տեղյակ չէ:
