«Նաիրիտ» գործարանի աշխատակիցներին չվճարված 11 ամիսների աշխատավարձի երկու ամիսների գումարը կվճարվի մինչև դեկտեմբերի 20-ը: Ընդ որում, մեկ ամսվանը կվճարվի մինչև այս շաբաթվա վերջը: Այս մասին Հանրային հեռուստաընկերության «Հարցազրույց» հաղորդման եթերում ասել է «Նաիրիտ» ՓԲԸ–ի գլխավոր տնօրեն Հովիկ Հախինյանը: «Իհարկե, եթե չբողոքեին, էլի կտրվեր, բայց մի քիչ ուշ՝ դեկտեմբերի սկզբին և վերջին»,- ասել է տնօրենը՝ հավելելով, որ գումարը փոխառություն են վերցնելու էներգետիկայի նախարարության ձեռնարկություններից, այդ թվում՝ Երևանի ՋԷԿ-ից. «Մենք պարտք ենք վերցնում՝ ավելացնելով մեր պարտքը»:
«Նաիրիտ»–ը, ըստ գլխավոր տնօրենի, ֆինանսական դժվարությունների պատճառով տեխնիկական կանգառի վիճակում է 2010 թ. ապրիլից: Անհնար էր այդ ժամանակ բոլորին վճարել, ուստի աշխատողների մի մասին ուղարկել են պարապուրդի, տեխնիկական ծառայողներին՝ ոչ:
Ըստ տնօրենի՝ այսօր կա ընկերության տեխնիկական վերականգնման, վերազինման և արտադրության վերսկսման հնարավորություն: Ծրագրի հեղինակը «Նաիրիտ»–ն է, ծրագիրն ընդունվել և հաստատվել է կառավարության կողմից:
Տնօրենը նշել է, որ գործարանը կաուչուկի վաճառքի խնդիր երբեք չի ունեցել, թեև ֆինանսատնտեսական ճգնաժամից հետո աշխարհում պահանջարկը քչացել է: Նախկինում 70 հազար տոննա կաուչուկ արտադրող «Նաիրիտ»-ն այսօր ընդամենը 10 հազար տոննա է կարող արտադրել:
Խորհրդային կարգերի փլուզումից հետո «Նաիրիտ»–ում ներդրում արվել է 2006 թվականին, երբ գործարանն անցավ «Ռայնովիլ»–ին: «Երբ «Ռայնովիլ» ընկերությանը վաճառվեց, ներդրումների 6 ծրագիր կար: Հետաքրքրված էին ընկերությունների կաուչուկի արտադրությամբ և վաճառքով: Ընկերության 80 տոկոս բաժնետոմսերը վաճառվեցին նրան: «Նաիրիտ»–ի սեփականատերն այժմ այդ ընկերությունն է, որը միջոցների սղության պատճառով չի կարող իրականացնել ներդրումների ծրագիրը»,- ասել է Հովիկ Հախինյանը և հավելել, որ պետք է «Նաիրիտ»–ն այս ընթացքում արդեն արտադրման ծավալները հասցներ 25 հազար տոննայի, սակայն որևէ բան չի արվել, և ծրագրերի խախտման պատճառով իրենք փորձում են այլ ընկերության հանձնել ձեռնարկությունը:
Անդրադառնալով աշխատավարձերի խնդրին՝ տնօրենը նշել է, որ եթե մինչև տարեվերջ կարողանան նոր պայմանագիրը կնքել կառավարչի հետ, ապա ներդրումների հենց առաջին հոսքից կվճարեն աշխատվարձը: Ի դեպ, տնօրենն ինքը աշխատավարձ չի ստացել, իսկ հարցին, թե ինչով է յոլա գնում, չի պատասխանել:
