Կալիֆոռնիայում ծնողները որդու հետ խեղդվել են՝ փորձելով փրկել շանը, որին լողափից քշել էր 3 մետրանոց ալիքը` հաղորդում է ABC News-ը:
Ընտանիքը հանգստանում էր Սան Ֆրանցիսկոյից հյուսիս գտնվող Հումբոլդտ շրջանում: Դեպքը տեղի է ունեցել նոյեմբերի 24-ին, սակայն ԶԼՄ-ները միայն այժմ են այդ մասին տեղեկացրել:
16-ամյա Գրեգորի-Ջեյմս Քուլջյանը (Gregory James Kuljian) կենդանու ետևից նետվել է ջուրը: Դեռահասին փորձել է օգնության հասնել հայրը՝ 54-ամյա Հովարդ Գրեգորի Քուլջյանը (Howard Gregory Kuljian), սակայն ալիքը նրան ափից հեռու է քշել:
Գրեգորին կարողացել է ինքնուրույն ափ դուրս գալ, որտեղ նրան սպասել են մայրը՝ 57-ամյա Մերի Ելենա Սքոթը (Mary Elena Scott), քույրն ու ընկերուհին:
Երբ պարզվել է, որ հայրը վտանգի մեջ է, Գրեգորին և նրա մայրը հետ ջուրն են նետվել՝ նրան փրկելու, սակայն իրենք էլ են խեղդվել` գրում է Associated Press-ը:
Իսկ շունը մինչ այդ կարողացել է ինքնուրույն ափ դուրս գալ: Գրեգորիի քույրն ու ընկերուհին ջուրը չեն մտել ու ոչինչ չեն ձեռնարկել:
Առափնյա ոստիկանությունը, որը փրկարար օպերացիա է սկսել, հայտնաբերել է ամուսինների` ափ շպրտված մարմինները:
Նրանց որդին մինչ այս պահը անհետ կորած է համարվում, սակայն նրան գտնելու հույս չկա, քանի որ որոնողափրկարարական աշխատանքները դադարեցված են:
