«Եթե ես ծնված լինեի ԱՄՆ-ում, ունենայի անգլոսաքսոնական ծագում, կհավակնեի Նոբելյան մրցանակի: Մնացած այլ պարագաներում ես Հրանտ Բագրատյանն եմ»,- այսօր լրագրողների հետ հանդիպմանը հայտարարեց ՀՀ նախկին վարչապետ, ՀԱԿ պատգամավոր Հրանտ Բագրատյանը՝ պատասխանելով հարցին, թե մամուլում լուրեր են շրջանառվում, որ Բագրատյանն ինքն է պատրաստվում առաջադրվել, եթե նախագահական ընտրություններում Լևոն Տեր-Պետրոսյանն այդպես էլ չառաջադրվի:
Նա շեշտեց, որ ՀԱԿ-ը պետք է և կունենա իր թեկնածուն, իսկ պոտենցիալ թեկնածուները շատ են՝ Լյուդմիլա Սարգսյան, Պետրոս Մակեյան…
«ՀԱԿ-ը պետք է ունենա իր թեկնածուն, եթե չենք սպանում շարժումը»,- հայտարարեց Հ. Բագրատյանը՝ հավելելով, որ եթե պետք է պաշտպանենք ինչ-որ մի «աշխատանքային կուսակցության», ապա Հրանտ Բագրատյանն ինքը տարբերակ կգտնի:
Հ. Բագրատյանը հայտնեց, որ ՀԱԿ-ը չպետք է անընդհատ կենտրոնանա ԲՀԿ-ի վրա և հանրությանը տեղեկացնի դրա մասին. «Վերջում կպարզվի, որ տակը բան չկա»:
