Եգիպտոսում հականախագահական բողոքի ակցիայի ժամանակ տուժել է նվազագույնը 100 մարդ: Այս մասին հայտնում է mignews.com-ը:
Հիշեցնենք, որ Եգիպտոսի նախագահ Մուհամմադ Մուրսին հրաման էր արձակել, որի համաձայն՝ նա իրեն է փոխանցել դատական իշխանության լիազորությունները, որպեսզի մտցնի շարիաթի օրենքների վրա հիմնված Սահմանադրություն:
Քաղաքական կուսակցությունները վրդովված են Մուրսիի՝ իրեն լայն լիազորություններով օժտելու որոշմամբ ու կոչ են արել իրենց ձախ, լիբերալ ու սոցիալիստ կողմնակիցներին հավաքվել՝ ի նշան բողոքի:
Բողոքի ակցիայի ժամանակ «սպաների» խումբը բաժանում էր թերթիկներ` «Լեգիտիմությունը ձեր կողմն է: Մենք Հայրենիքը կպաշտպանենք մեր կյանքով» գրառմամբ:
Եգիպտական բանակը նույնպես սկսում է խառնվել բողոքի ցույցերին՝ անցնելով հասարակության կողմը՝ ընդդեմ Մուրսիի: Այս մասին այսօր հայտնել է արաբական «Ալ-Կուդս Ալ-Արաբի» թերթը:
Եգիպտոսի նախագահի կողմնակիցները ցույցեր են կազմակերպել՝ ի պաշտպանություն Մուրսիի, իսկ ընդդիմությունը նրան մեղադրում է իշխանությունը ուզուրպացնելու մեջ:
