ԲՀԿ-ն կանգնած է հետագա տարիների անելիքի խնդիրը լուծելու հարցի առջև: Այսօր լրագրողների հետ հանդիպման ժամանակ այս մասին ասաց ԱԺ «Հանրապետական» խմբակցության պատգամավոր Արտակ Զաքարյանը՝ խոսելով ներքաղաքական զարգացումների շուրջ: Նա նշեց, թե «Հանրապետական» կուսակցությունը վստահ է, որ իր թեկնածուն, ունենալով մեծ քաղաքական փորձ, լինելով ՀՀ խնդրների լուծման ակունքներում, հերթական անգամ է արժանանալու հասարակության բարձր վստահությանը, ուստի և հնարավորություն է ստանալու պաշտոնավարելու ևս մեկ անգամ:
Ըստ բանախոսի՝ առաջիկա տարիներին ՀՀ ռեսուրսներն ավելի ընդլայնված են լինելու: Հարցին, թե ինչն էր խանգարում ՀՀ նախագահ Սերժ Սարգսյանին պաշտոնավարման տարիների ընթացքում լուրջ քայլեր ձեռնարկել՝ նա պատասխանեց, որ աշխարհում մեր պետության հետ առնչություն չունեցող, մեր կամքից անկախ գործընթացներ են եղել, ինչպիսին է համաշխարհային տնտեսական ճգնաժամը: Նա հիշեցրեց, որ նույնիսկ խոշոր տնտեսություն ունեցող երկրները չեն կարողացել դեռևս դուրս գալ այդ դժվարություններից:
Խոսելով նախագահի ԲՀԿ թեկնածուի շուրջ՝ նա նկատեց, որ այսօր ԲՀԿ-ն հետագա տարիներին անելիքի խնդիրը լուծելու փաստի առաջ է կանգնած: «Նրանք լրջորեն չեն մտածում նախագահ ունենալու մասին: ԲՀԿ որևէ թեկնածուի առաջադրմամբ փորձելու են իրենց կուսակցության դերակատարությունը հետագա տարիներին կարևորել: Միասնական թեկնածու, կարծում եմ, չի լինի, եթե լինեն միավորումներ՝ կլինեն արհեստական և լոկալ» ,- մեկնաբանեց բանախոսը:
