Արգենտինայի դատարանը առաջատար բրիտանացի գիտնական Փոլ Ֆրեմփթոնին 4 տարի 8 ամիս ազատազրկման է դատապարտել՝ կոկաինի մաքսանենգության մեղադրանքով: Թմրադիլերներին հաջողվել է պրոֆեսորին իրենց շարքերը հավաքագրել այն բանից հետո, երբ նրա հետ համացանցով կապ են հաստատել՝ ներկայանալով որպես նախկին «Միս Բիկինի աշխարհ» Դենիզ Միլանի: Այս մասին գրում է The Daily Mail-ը:
Ֆրեմփթոնը ձերբակալվել է այս տարվա հունվարին՝ Արգենտինայից Պերու մոտ 2 կգ կոկաին փոխադրելու փորձի ժամանակ: Նրա մոտ թմրանյութը հայտնաբերել էին Բուենոս-Այրեսի օդանավակայանում ստուգման ժամանակ: Թմրանյութը թաքցված է եղել ճամպրուկի աստառի տակ:
Ձերբակալությունից հետո, Հյուսիսային Կարոլինայի համալսարանի ֆիզիկայի դասախոսը հայտնել է, որ իրեն խաբել են թմրադիլերները: «Ես կարծում էի, թե խոսել եմ գեղեցիկ կնոջ հետ»,- բացատրել է 68-ամյա գիտնականը:
«Մոդելը» նրան առաջարկել է հանդիպել Բոլիվիայում, նա էլ առանց երկար մտածելու համաձայնել է: Սակայն երկրի մայրաքաղաք Լա-Պասում նրան դիմավորել է մի միջահասակ տղամարդ և ասել, որ Միլանին արդեն գնացել է Բուենոս-Այրես և նրան թողել իրերով լի ճամպրուկ, որը նա պետք է իր հետ տանի:
