Գագիկ Ծառուկյանը յուրային կայքերից մեկին հայտարարել է, որ կայացրել է նախագահական ընտրությունների վերաբերյալ իր որոշումը, սակայն քանի որ ժամանակ կա, ինքը դեռ չի հրապարակում այն, այլ լսում է հավելյալ, կուսակցական և հարակից` քաղաքական կարծիքներ:
Սա մի փոքր զարմանալի է: Սովորաբար, մարդիկ լսում են հավելյալ կարծիքներ, ծանրութեթև են անում իրավիճակը, նոր են որոշում կայացնում: Այսինքն` հավելյալ կարծիքները որոշում կայացնելու գործընթացի մասին են, ոչ թե հետագայի` երբ որոշումը կայացնում ես, ոչ մեկին չես ասում, ու հետո կարծիքներ ես հարցնում:
Սա, մեղմ ասած, անտրամաբանական վիճակ է: Սակայն այս ամենից էլ կարծես թե նշմարվում է այն, ինչ ուզում է ասել Ծառուկյանը: Նա մի կողմից` կարծես ուզում է յուրայինների մոտ առկա խուճապը մեղմել այս առումով, քանի որ նրա լռությունն ու անորոշությունը արդեն սկսել են անհանգստացնել և տարաբնույթ կասկածների տեղիք տալ անգամ իր կուսակցական շրջանակներում, որտեղ սկսել են կասկածել առաջնորդի ամենակարողության և ինքնավստահության վրա, սկսել է տատանվել նրա խարիզման: Այս շերտերի համար Ծառուկյանը հայտարարում է, որ որոշում կայացրել է: Սակայն հենց նա սկսում է բացատրել, թե ինչու չի հրապարակում իր որոշումը, կասկածներն ըստ էության ավելի են խորանում, թե նա իրականում ունի որոշում: Սա էլ խնդրի մյուս կողմն է:
Մի կողմից` Ծառուկյանը փորձում է կանխել իր խարիզմայի տատանումները կուսակցությունում, զսպել խուճապը շարքերում, մյուս կողմից` նա մեսիջ է հղում քաղաքական դաշտին ու իշխանություններին: Եթե մարդը հայտարարում է, որ որոշում կայացրել է` շարունակելով, թե դեռ լսում է կարծիքներ, ուրեմն նա ակնարկում է իր որոշման փոփոխականության, որոշումը փոխելու հավանականության, պատրաստակամության մասին:
Այսինքն` ԲՀԿ-ի առաջնորդը ըստ էության հայտարարում է մրցույթ իր որոշման համար, և ով լավ գին վճարի դրա դիմաց, նա, ըստ այդմ էլ, կփոխի իր որոշումը: Ասել կուզի, որ Ծառուկյանը սպասում է, այսպես ասած, ընդդիմադիր և իշխանական դաշտի առաջարկներին, բայց իհարկե` ամենից առաջ սա մեսիջ է Ռոբերտ Քոչարյանին ու Սերժ Սարգսյանին, որոնք Ծառուկյանի կուսակցության և որոշման համար երկու հիմնական պայքարողներն են:
ԲՀԿ նախագահը հայտարարում է, որ որոշում ունի, և ըստ ամենայնի` սպասելու է, թե այդ որոշման դիմաց ինչ կխոստանան, ինչ կասեն, այդ կապակցությամբ ինչ կառաջարկեն Ռոբերտ Քոչարյանն ու Սերժ Սարգսյանը, և ըստ այդմ էլ` կամ կհաստատի, կամ կփոխի, իսկ ավելի շուտ` ըստ իր հնարքի էլ կկայացնի որոշումը:
Այլ կերպ ասած` Ծառուկյանը, ըստ ամենայնի, որոշել է դիմել բլեֆի, ինչը նշանակում է, որ նրա համար իսկապես ծանր է դառնում մանևրը Քոչարյանի ու Սարգսյանի միջև, միաժամանակ «սիրախաղը» Տեր-Պետրոսյանի հետ:
