Վրաստանում տեղի ունեցող գործընթացները և՛ որպես քաղաքական հալածանք, և՛ որպես արդարության վերականգնում կարելի է որակել: Այսօր «Առաջին լրատվական»-ի հետ զրույցում այս մասին ասաց «Բազմազգ Վրաստան» քաղաքացիական շարժման ղեկավար Առնոլդ Ստեփանյանը՝ խոսելով Վրաստանում տեղի ունեցող զարգացումների, ձերբակալությունների մասին։
Մասնավորապես, անդրադառնալովԻրակլի Օկրուաշվիլիի ձերբակալությանը, նա ասաց, որ Վրաստանի պաշտպանության նախկին նախարարը միջազգայինհետախուզման մեջ էր, ուստի բնական էր, որ հայրենիք վերադառնալուն պես՝ պետք է ձերբակալվեր: «Ես կասեի, որ դա իրականացվում է արդարության վերականգնման համար»,- նկատեց Առնոլդ Ստեփանյանը՝ հավելելով, որ երկրում առկա խնդիրները փուլերով լուծվում են:
Երկրորդ կարևոր խնդիրը, որը Վրաստանի կառավարության ուշադրության կենտրոնում է, Առնոլդ Ստեփանյանի խոսքերով, քաղբանտարկյալների հարցն է, որոնց մեջ առնվազն երկու հայ կա. «Հիմա այդ գործերը պետք է վերանայվեն»:
Խոսելով այն դիմումից, որով Վրաստանի վարչապետ Բիձինա Իվանիշվիլին երկրի նախագահ Միխեիլ Սաակաշվիլիին հորդորում է լքել նախագահական նստավայրը, որպեսզի կրճատվեն նախագահի աշխատակազմի ծախսերը՝ Ստեփանյանն ասաց, որ սա երկու կերպ կարող է մեկնաբանվել. «Ոմանք ասում են, որ իսկապես կա ծախսեր կրճատելու անհրաժեշտություն, որը և փորձում է Իվանիշվիլին իրականացնել: Ոմանք ասում են, որ սա քաղաքական հետապնդում է: Երկու տեսակետն էլ կարող են շրջանառվել, երկուսն էլ հնարավոր են, բայց նախագահական աշխատակազմի ծախսերն, այնուամենայնիվ, շատ են»։
Հիշեցնենք, որ Իվանիշվիլին դիմել էր Սաակաշվիլիին Թբիլիսիում գտնվող նախագահական նստավայրն ազատելու պահանջով:Վարչապետը Սաակաշվիլիին առաջարկել էր տեղափոխվել կառավարության շենք, որտեղ նախագահին խոստացել էր հատկացնել մի ամբողջ հարկ: Իվանիշվիլիի համոզմամբ՝ նախագահական նստավայրի ծախսերը «պետության վրա թանկ են նստում»:
