Intel ընկերության ղեկավար` պաշտոնը 2013-ի մայիսին լքող Փոլ Օտելինիին կարող է փոխարինել ընկերության օպերացիոն գծով գլխավոր տնօրեն Բրայան Կրժանիչը, որն այդ պաշտոնը զբաղեցնում է այս տարվա հունվարից: Այս մասին հայտնում է Financial Times-ը:
62-ամյա Օտելինին ընկերության 44-ամյա պատմության 5-րդ ղեկավարն էր և կարող էր պաշտոնում մնալ մինչև 65 տարեկանը, սակայն որոշել է 3 տարի շուտ հեռանալ: Թոշակի անցնելու Օտելինիի որոշումը նրա սեփական նախաձեռնությունն է` ընկերությունում շուջ 40 տարվա աշխատանքից հետո՝ նշում են Intel-ի մոտ կանգնած աղբյուրները:
Օտելինին գործադիր տնօրենի պաշտոնը զբաղեցրել է 2005 թվականից: Այդ ժամանակից կորպորացիան շուկա է դուրս բերել ուլտրաբուքեր, սմարթֆոններ և պլանշետային համակարգիչներ՝ Intel չիպերով:
Intel-ի բաժնետոմսերն այս տարի ընկել են 16 տոկոսով, սակայն դրանց գինը չի փոխվել Օտելինիի հեռանալու մասին լուրերի ֆոնին:
Օտելինին կլքի ընկերությունն առանց իրավահաջորդ թողնելու, ինչը չի համապատասխանում Intel-ի ավանդույթներին:
