ՀԱՄԱՍ-ի և Իսրայելի միջև խաղաղաության համաձայնագիրը կարող է ստորագրվել մի քանի ժամերի ընթացքում: Այս մասին հաղորդել է «Ալ-Արաբիա» հեռուստաալիքը:
Ավելի վաղ, հղում անելով իր տեղեկացված աղբյուրներին, հեռուստաալիքը հաղորդել էր կողմերի միջև կրակը դադարեցնելու համաձայնագրի սկզբունքների ձեռքբերման մասին: Իհարկե, կողմերի միջև դեռ առկա են ժամանակային և փուլերի վերաբերյալ տարաձայնություններ: Այսպես՝ ՀԱՄԱՍ-ը պնդում է ռազմական գործողությունների անմիջապես դադարեցման վրա, սակայն իսրայելցիները ցանկանում են, որ հաշտությունը երկու փուլով տեղի ունենա. սկզբում կրակի դադարեցում, այնուհետև Գազայի շրջափակումից դուրս բերում, ինչը հանդիսանում է համասցիների գլխավոր պահանջներից մեկը:
Իսլամիստների քաղբյուրոյի ղեկավար Հալեդ Մաշալը Կահիրեում մամլո-ասուլիսի ժամանակ հաղորդել է, որ Գազայում հաշտության բանակցությունները կշարունակվեն եգիպտական միջնորդությամբ, սակայն ՀԱՄԱՍ շարժումը զիջումների գնալ չի պատրաստվում:
Ըստ Մաշալայի՝ Իսրայելը առաջինն է սկսել հարձակումը Գազայի վրա և եթե խաղաղություն է ուզում, ապա ինքն էլ պետք է դադարեցնի կրակը:
Դրա հետ մեկտեղ, կատարյան «Ալ-Ջազիրա» հեռուստաալիքի տեղեկություններով՝ Իսրայելի վարչապետ Բենյամին Նեթանյահուն ԱՄՆ-ի և Եգիպտոսի խնդրանքով համաձայնել է 24 ժամով հետաձգել ցամաքային հարձակման օպերացիան՝ պայմանով, որ ՀԱՄԱՍ-ը կդադարեցնի հրթիռային հարձակումները:
Համաձայն այս պահին եղած տեղեկությունների՝ իսրայելական ռազմաօդային ուժերը այսօր հարված են հասցրել պաղեստինյան ՀԱՄԱՍ շարժման ռազմական թևի ղեկավարներից մեկի տանը:
