ԲՀԿ խոսնակ Տիգրան Ուրիխանյանը երեկ «Հայկական ժամանակ»-ի թղթակցի հետ զրույցում հայտարարել է, որ ԲՀԿ Շիրակի մարզային խորհուրդը, որի ղեկավարը վերջերս քաղաքապետ ընտրված Սամվել Բալասանյանն է, որոշում է կայացրել թիվ 35 ընտրատարածքում պաշտպանել ՀՀԿ-ի առաջադրած Արման Սահակյանի թեկնածությունը:
Դեկտեմբերի 2-ին թիվ 35 ընտրատարածքում կայանալիք Աժ ընտրություններին մասնակցում է երկու թեկնածու` ՀՀԿ-ից Արման Սահակյանը և ՀԱԿ-ից Մուրադ Գրիգորյանը: Ինչպե՞ս ստացվեց, որ ՀՀԿ-ի դեմ անխոնջ պայքար հայտարարած ԲՀԿ-ն պաշտպանում է ոչ թե Սերժ Սարգսյանի ռեժիմի կործանումը թիվ մեկ նպատակ հայտարարած ՀԱԿ-ի թեկնածուին, այլ հենց ՀՀԿ-ի թեկնածուին: Այս հարցին երեկ տարբեր պատասխաններ հնչեցին: Սակայն, հիմնական տրամաբանությունն այն էր, որ դա ոչ թե ԲՀԿ-ի որոշումն է, այլ ԲՀԿ-ի տարածքային կառույցի:
«Ես գիտեմ, որ «Բարգավաճ Հայաստան» կուսակցությունն այսօր իր գործելակերպով հանրապետությունում ընդդիմություն է: Կարծում եմ, որ Բալասանյանի հայտարարությունը հիշեցրեց որպես անձի հայտարարություն, իր թիմի հայտարարություն: Դրանից մենք բացարձակապես չենք մտահոգվում»,- տեղի ունեցածը երեկ «ՀԺ» թղթակցի հետ զրույցում այսպես է մեկնաբանել թիվ 35 ընտրատարածքով ՀԱԿ թեկնածու Մուրադ Գրիգորյանը:
«Սա ԲՀԿ-ի պաշտոնական տեսակետը չի: Տարածքային կաոույցի որոշումը չի նշանակում, որ սա «Բարգավաճ Հայաստան» կուսակցության պաշտոնական դիրքորոշումն է: Ես տարածքային կառույցի որոշումը չեմ մեկնաբանում»,- սա էլ Հայ ազգային կոնգրեսի խոսնակ Արման Մուսինյանի պատասխանն է: