Սնանկացման եզրին հասած գործարար Փայլակ Հայրապետյանը նախօրեին նամակով դիմել է վարչապետ Հովիկ Աբրահամյանին և 5 րոպեով հանդիպում խնդրել վերջինից: Այս մասին «Առաջին լրատվական»-ի հետ զրույցում ասաց ինքը՝ Փայլակ Հայրապետյանը:
«Ես դիմում եմ գրել, խնդրել եմ ինձ 5 րոպեով ընդունել: Ես շատ բան չեմ խնդրում, ուղղակի թող իմ գործերը նայի: Բոլոր փաստաթղթերը դիմումի հետ միասին ուղարկել եմ ու արդարություն եմ խնդրում: Ես ուզում եմ նրան ասել, որ իմ ունեցածը դրել եմ նախարարության, նախկին վարչապետի պահանջով, որ մեր երկիրը ծաղկի, բայց հետո իրենք իմ գումարները տարել-գցել են իրենց հաշվին: Ես ոչ սուտ խոսելու բան ունեմ, ոչ կլյաուզա անելու առիթ: Իրականությունը 100 անգամ ասվել է»,- ասաց Հայրապետյանը՝ հավելելով, որ Հովիկ Աբրահամյանը դեռևս չի արձագանքել իր խնդրանքին:
Նշենք, որ օրեր առաջ էլ մեկ այլ «քցված» գործարար՝ «Հին Էրիվան» հոլդինգի սեփականատեր Մանվել Տեր-Առաքելյանն էր հանդիպել Հովիկ Աբրահամյանին և խնդրել միջամտել իր գործին ու թույլ չտալ, որպեսզի խլեն իր բիզնեսը: Հովիկ Աբրահամյանն էլ խոստացել էր ուսումնասիրել հարցը և անպայման արձագանքել:
Փայլակ Հայրապետյանն ասաց, որ Մանվել-Տեր-Առաքելյանին չի ճանաչում, նրա խնդրին տեղյակ չէ, բայց Հովիկ Աբրահամյանին հավատում է: «Ես ամենայն պատասխանատվությամբ հայտարարում եմ, որ մեր նոր վարչապետը շատ մեծ գործեր կանի մեր տնտեսության համար: Ես վստահ եմ: Էս երկրում օրենք կա, ամեն ինչ էլ կա: Եթե օրենքով շարժվեն, ամեն ինչ էլ կստացվի: Օրինակ՝ իմ գործով եթե նախկին վարչապետին տանեն և հրապարակում կախեն, բոլոր հարցերը կլուծվեն. էլ ոչ մեկը ռիսկ չի անի մյուսին կպնի»,- ասաց Հայրապետյանը:
Հայրապետյանը համաձայն չէ դիտարկմանը, որ Հովիկ Աբրահամյանը նույն իշխանության մասն է, որի մասն էր նաև Տիգրան Սարգսյանը, և որ խնդիրն անձերի մեջ չէ, այլ համակարգի:
«Չէ, նույնը չեն: Հովիկ Աբրահամյանի հետ ես մեծ հույս եմ կապում: Նա զարկ կտա Հայաստանի տնտեսությանը, և տնտեսությունն էլ կբարգավաճի: Ինքը գյուղացի տղա ա, ինքը բանվորի տղա ա, ինքը շատ բաներ գիտի, որ Տիգրան Սարգսյանը չգիտեր: Չգիտեմ՝ իմ գործի համար ինչ կանի, բայց որ ինքը գյուղացիներին, բանվորներին կօգնի՝ երկրորդ կարծիք լինել չի կարող: Դա իմ կարծիքն է»: