Ուինսթոն Չերչիլի կրտսեր դուստր լեդի Մերի Սոամսը մահացել է 91 տարեկան հասակում։ Այդ մասին հայտնել է նրա ընտանիքը, հաղորդում է BBC-ն։
Մերի Սոամսը վախճանվել է շաբաթ օրը իր տանը կարճատև հիվանդությունից հետո։ Նա կրտսերն էր Մեծ Բրիտանիայի նախկին վարչապետի ու նրա կնոջ՝ Կլեմենտինայի հինգ զավակներից։
«Նա իսկապես հրաշալի ու ինքնատիպ կին էր, որն ապրել է նշանակալի կյանք»,- հիշում է հանգուցյալի որդիներից մեկը։
Մերի Սփենսեր-Չերչիլն աշխատել է Կարմիր խաչի ընկերությունում՝ Մեծ Բրիտանիայի կանանց կամավորական ծառայությունում, 1941-1946 թթ. ծառայել է օժանդակ ծառայությունում, ստացել է կրտսեր սպայի կոչում։ Նա բազմիցս ուղեկցել է իր հորը նրա շրջագայությունների ժամանակ, այդ թվում՝ Պոտսդամ, որտեղ Ուինսթոն Չերչիլը հանդիպել է Հարրի Թրումենի ու Իոսիֆ Ստալինի հետ և քննարկել Գերմանիայի և Եվրոպայի հետպատերազմյան ապագան։
Չերչիլի դուստրը վարել է ակտիվ հասարակական կյանք, երկար ժամանակ համագործակցել է Պահպանողական կուսակցության հետ։ Կյանքի վերջին տարիներին շատ է զբաղվել բարեգործությամբ և գրել է մի շարք կենսագրական գրքեր։
