ՀՀ խոշոր հարկատուների ցուցակում, ըստ էության, ոչ մի բան չի փոխվում և չի էլ կարող փոխվել, որովհետև այն տնտեսական քաղաքականությունը, որ վարվում է երկրում, չի կարող մեզ մոտ բերել նրան, որ խոշոր հարկատուների մոտ փոփոխություններ լինեն: Արդյունքում, տարիներ շարունակ մի քանի ընկերություններ են հիմնական հարկ վճարողները, և կա՛մ ներկրող ընկերությունն է առաջատար լինում, կա՛մ պղինձ, մոլիբդեն արդյունահանող ընկերությունը: Նման գնահատական «Առաջին լրատվական»-ի հետ զրույցում տվեց ՀԱԿ ներկայացուցիչ, տնտեսագետ Վահագն Խաչատրյանը:
Ըստ նրա՝ «Հայռուսգազարդ» ընկերության վճարած հարկի աճի հետ կապված՝ պետք է ճշտել, թե «Հրազդանի» ՋԷԿ-ի 5-րդ էներգաբլոկի հարկերը մտնո՞ւմ են «Հայռուսգազարդ» վճարած հարկերի ցուցանիշների մեջ, թե միայն գազի մատակարարումների հետ կապված հարկերն են, քանի որ մոտ 42 % աճ է գրանցվել: Տնտեսագետի կարծիքով՝ այդքան աճը միայն գազի ներկրման հետ կապված չի կարող լինել, իսկ 5-րդ էներգաբլոկը ՀՀ էներգետիկ ցանցին միացվեց այս տարվա հունվարից:
«Քանի որ մատակարարման ավելացում տեղի չի ունեցել, համապատասխան լրացուցիչ հարկեր պետք է որ չառաջանային: Մի հանգամանք էլ կա, որ կառավարությունը ԱԱՀ արտոնություն է տալիս այն ձեռնարկություններին, որոնք ներկրում են 300 մլն դոլարից ավելի սարքավորումներ: Միգուցե եկել է այդ ժամկետը, որ Հայռուսգազարդը պետք է վճարեր այդ հարկերը: Այսինքն, կոնկրետ տնտեսական գործունեությամբ չի պայմանավորված «Հայռուսգազարդի» այսքան հարկ վճարելը: Օրինակ՝ նույն Զանգեզուրի պղնձամոլիբդենային գործարանը նվազեցրել է հարկերը՝ կապված միջազգային գների նվազման հետ: Եթե ընդհանուր 10 հարկատուները նայում ենք, երևում է, որ մեզ մոտ էական փոփոխություն չկա, ինչքան էլ կառավարությունը խոսում է տնտեսության դիվերսիֆիկացիայի մասին, դա չկա, և դա է պատճառը, որ տարիներ շարունակ հարկատուները կրկնվում են կամ մնում են նույնը»,- ասաց Վ. Խաչատրյանը:
Հիշեցնենք, որ Հայաստանի խոշոր հարկատուների տասնյակում են փաստացի ռուսական վերահսկողության տակ գտնվող 2 ընկերություններ, 2 հանքարդյունահանողներ, 2 կապի ոլորտի ներկայացուցիչներ, վառելիքի շուկայի 2 մենաշնորհատերեր:
