Իրանը վճռականորեն քննադատում է Իսրայելի վարչապետ Բինիամին Նեթանյահուի սադրիչ և թշնամական գործողություններն իսլամական հանրապետության դեմ։ Այս մասին գրում է իրանական Iranvij հրատարակությունը:
Իրանը նույն բովանդակությամբ երկու նամակ է ուղարկել ՄԱԿ ԱԽ նախագահի և ՄԱԿ գլխավոր քարտուղարի անուններով, որոնցում նշվում է Իսրայելի սպառնալիքների մասին՝ Իրանի միջուկային օբյեկտների վրա հարձակվելու վերաբերյալ:
ՄԱԿ-ում Իրանի ներկայացուցիչ Մուհամմեդ Հազային հրեական պետության հայտարարությունը «սադրիչ» է անվանել, անպատասխանատու և անարդարացված, որը հակասում է ՄԱԿ բանաձին:
Հազայի խոսքերով՝ իր համար ծիծաղելի է, որ նման հայտարարությունները հնչում են մի երկրից, որը իր միջուկային զենքն ամբողջ աշխարհից գաղտնի է մշակել, և որը սպառնում է տարածաշրջանի անվտանգությանը և ողջ մարդկությանը:
ՄԱԿ-ին ուղղված հայտարարության մեջ Իրանն ընդգծում է, որ առաջինը չի ձեռնարկի ռազմական գործողություններ, սակայն ՄԱԿ-ի կանոնադրության համաձայն՝ իրեն ինքնապաշտպանության իրավունք է վերապահում, և եթե Իրանի ժողովուրդը կամ տարածքը ենթարկվի վտանգի, ապա ցանկացած ագրեսիայի դեմ պատասխանը վճռական կլինի:
