Կիպրոսի հյուսիսի կրոնական միավորումների կազմակերպությունը վարձակալությամբ հանձնել է պատմական գեղեցիկ վերականգնված հայկական տարածքը՝ անարդար և ոչ թափանցիկ մրցութային գործընթացով: Այս մասին հայտնում է Asbarez-ը՝ հղում անելով ՄԱԿ-ի Զարգացման ծրագրի՝ «Գործողություն հանուն Համագործակցության և վստահության» ծրագրին (UNDP-ACT):
EVKAF կազմակերպությունը, որը վերահսկում է հյուսիսի կրոնական հաստատությունները, օգոստոսին վարձակալության է հանձնել Նիկոսիայի հյուսիսային Արաբահմետ շրջանում գտնվող 14-րդ դարի հայկական Սուրբ Աստվածածին եկեղեցին և վանական համալիրը, որը վերանորոգվել էր ծրագրի հատկացրած գումարներով՝ որպես հաշտեցմանն ուղղված միջոցառում:
Օկուպացված (Հյուսիսային) Կիպրոսի մամուլի փոխանցմամբ՝ 10 տարի ժամկետով տենդերում հաղթել է Մերձավոր Արևելքի համալսարանը՝ վերածելու այն մշակութային կենտրոնի:
Խորհրդարանում հայ ներկայացուցիչ Վարդգես Մահտեսյանի խոսքով՝ նման քայլը դեմ է նախագծի բուն նպատակին: «Նպատակը եղել է համայնքների միավորման համար բազմահամայնք տարածք ստեղծելը, ինչ վերաբերում է եկեղեցուն, այն նախատեսված էր հայ համայնքի համար` որպես նրանց պաշտամունքի վայր»,- ասել է նա:
UNDP-ACT-ն արձագանքել է Մահտեսյանի մտահոգություններին:
Շահառուներն աշխատել են «վերականգնել տարածքը միջազգային չափանիշներին համապատասխան` այնպես, որ այն կարողանա նպաստելԿիպրոսում բոլոր համայնքների միջև հաշտեցմանն ու խաղաղությանը»,- ասված է UNDP-ACT-ի և USAID-ի հայտարարությունում:
Նրանք չեն հաղորդել տենդերի հաղթողի անունը, պարզապես հայտնել են, որ վերջերս, իրենց տեղեկություններով, EVKAF-ը վարձակալության է հանձնել տարածքը անարդար և ոչ թափանցիկ տենդերային գործընթացի միջոցով: Նրանք լուրջ անհանգստություն են հայտնել EVKAF-ին՝ անընդունելի քայլի առնչությամբ, և սպառնացել դադարեցնել վերականգնման համար հատկացվող ֆինանսավորումը: USAID-ն ու UNDP-ACT-ը 3,5 մլն եվրո են ներդրել իրենց իսկ կոչած «տեսլական ջանքերում»:
«UNDP-ն և USAID-ը անհամբեր սպասում են խնդրի անհապաղ լուծմանը, որպեսզի մենք կարողանանք շարունակել աջակցել Կիպրոսի բոլոր համայնքների մշակութային ժառանգության նախաձեռնություններին»,-գրում է Cyprus Mail-ը:
Մահտեսյանը գովել է Սուրբ Աստվածածին վանական համալիրի վերակառուցումը և մատնանշել տենդերային գործընթացի չեղյալ հայտարարման կարևորությունը: UNDP-ի և USAID-ի տեղեկություններով՝ Կիպրոսի թուրքական հատվածի ղեկավարությունը համաձայնել է հետաքննություն անցկացնել և անհրաժեշտության դեպքում քայլեր ձեռնարկել: