«Գրական թերթ»-ի խմբագիր, դրամատուրգ Կարինե Խոդիկյանը և «Ազգ» օրաթերթի գլխավոր խմբագիր Հակոբ Ավետիքյանն այսօր անդրադարձան արտագաղթի ցավոտ խնդրին: Կ. Խոդիկյանը նշեց, որ «Գրական թերթ»-ում արդիական և հրատապ է արտագաղթի թեման:
«Պաշտոնական տվյալներին եմ նայում, նայում եմ ազատ և անկախ մամուլի ներկայացրած թվերին, և երկուսն էլ եկան հանգեցին այն եզրակացության, որ օրական 200-300 մարդ լքում է Հայաստանը»,- ասաց նա:
Դրամատուրգի խոսքով` արտագաղթի մասին գրում են տեղի, մարզերի, սահմանամերձ գյուղերի գրողները: Նա որպես օրինակ նշեց Աշխեն Աբազյանի` Տավուշի մարզի Բարեկամավան գյուղի մեռած և անբարեկարգ տների մասին գրական թերթում տպագրված հոդվածը, որը մեծ արձագանք է ստացել, խմբագրությունը բազմաթիվ զանգեր է ստացել.
«Գրողի գրածի մեջ թուղթ ու գիր կա, նա չի գրում այս կամ այն կուսակցության պատվերով կամ ինչ-որ մեկի թելադրանքով, գրում է խղճի թելադրանքով»,- ասաց Կարինե Խոդիկյանը:
Վերջինիս կարծիքով` արտագաղթը պայմանավորված է նախևառաջ սոցիալական խնդրով, բացի այդ` անարդարության խնդիր կա. ամեն քայլափոխի մարդը բախվում է անարդարության հետ` իրենց զավակների համար ապագա չեն տեսնում այստեղ:
«Ազգ» օրաթերթի գլխավոր խմբագիր Հակոբ Ավետիքյանը լիովին համաձայն է Կարինե Խոդիկյանի հետ: Նրա խոսքով` Հայաստանում ով էլ լինի իշխանության գլուխ, նրա գլխավոր պարտականությունն է լինելու ասել` ժողովուրդ, կանգ առեք: Իշխանական կողմը, նրա խոսքով, խուսափում է այդ շեշտադրումը կատարելուց, իսկ ընդդիմությունն էլ այդ հարցը բարձրացնում է իշխանությանը փնովելու պատճառով: «Մենք ունենում ենք չփոփոխվող, չբարելավվող իրականություն»,-ասաց նա:
Խնդիրը միայն արդարության ձգտումով կամ սոցիալական վիճակով պայմանավորելը ճիշտ չէ, քանի որ Հակոբ Ավետիքյանը գիտի ընտանիքների, որոնք այստեղ բավականին հաջողությունների են հասել, բայց հիմա ընտանիքներով մեկնում են: Ըստ նրա` մարդկանց մոտ այն մտայնությունն է, թե դրսում ավելի լավ է:
Կարինե Խոդիկյանի խոսքով` այստեղ մարդն իրեն ոչ թե երկրի տեր, այլ ոչինչ է զգում:
Ըստ նրա` այսօր ամբողջ «բազարը» գնում է ինչ-որ կուսակցությունների շուրջ, ոչ մի կուսակցության, որևէ քաղաքական ուժի մտքով չի անցնում կապի մեջ մտնել հասարակության հետ. կա˚ որևէ մեկը, որ նպատակ ունի իր ծրագրերը ներկայացնելու. խավարասերների հավաք են կազմակերպել վերևում:
«Մերոնք մտածում են, որ իրենց մնալով և գնալով ոչինչ չեն լուծում», – նկատեց դրամատուրգը:
Հ. Ավետիքյանի կարծիքով` ով լինի մեր լիդերը և ով կա, առանց ժամանակ կորցնելու` պետք է իսկապես խոստանա, որ կկանգնեցնի այն, ինչ դրսից է կատարվում, կկանգնեցնի նաև «Հայրենակիցներ» ծրագիրը: Ըստ նրա` ուղեղների արտահոսք է տեղի ունենում:
Կարինե Խոդիկյանի դիտարկմամբ` եթե այս անկախության քսան տարիների ընթացքում լիներ այն համոզմունքը, որ երկիրը չպետք է քառասուն տզրուկի ձեռքին խաղալիք դառնա, որ ամեն մարդ հանրաքվեին տված իր այո-ին տեր պետք է կանգնի, այսպիսի արտագաղթ չէր լինի:
Ըստ Կարինե Խոդիկյանի` պատերազմի, մութ ու խավար տարիներին այսքան ծավալների չէր արտագաղթը, որքան հիմա, երբ կա լույս, և ամեն ինչ լի է: Մարդիկ, ըստ նրա, չեն հավատում, որ իրենց ճակատագիրը, իրենց երկրի ապագան տնօրինում են երկրի մասին մտածող ղեկավարները:
