Կառավարման համակարգի փոփոխության ԲՀԿ առաջարկը նպատակ ունի նախընտրական շրջանում քաղաքական ուժերին կոնսոլիդացնել ԲՀԿ-ի շուրջը: Այսօր լրագրողների հետ հանդիպման ժամանակ ՀՀԿ-ական պատգամավոր Մկրտիչ Մինասյանը և ՀԴԿ ղեկավար Արամ Սարգսյանը, խոսելով ներքաղաքական զարգացումների և ազդակների` քաղաքական վերջին հայտարարությունների շուրջ, նման եզրահանգման եկան:
Ըստ Արամ Սարգսյանի՝ ԲՀԿ առաջարկը կառավարման խորհրդարանական համակարգին անցնելու այսօրվա գաղափար չէ, դա եղել է ՀՅԴ և ՀԴԿ ծրագրային դրույթն անցյալում, վեց կուսակցություններ ձեռնամուխ էին այդ սահմանադրական փոփոխություններին, և հիմա չգիտես՝ ինչ պատեհ առիթ էր, որ ԲՀԿ-ն որոշեց այսօր խոսել այդ մասին:
Բանախոսի համոզմամբ՝ դա միանշանակ նախընտրական քայլ է: «Սա ձև է նախընտրական շրջանում կոնսոլիդացնելու իրենց շուրջը քաղաքական ուժերին: «Եկեք, ժողովուրդ, հավաքվենք և անցնենք այս համակարգին»: Դրանով իսկ առաջ կգան այն կուսակցությունները, որոնք համաձայն են եղել այս սահմանադրական փոփոխությանը, իսկ նա, ով առաջարկել է, կդառնա առաջատար քաղաքական ուժը: Ստացվում է, որ մի նոր դաշինք կձևավորվի»,- ներկայացրեց իր մեկնաբանությունը Արամ Սարգսյանը՝ շարունակելով, որ դեռ չի կարող ասել, թե սա ում թեկնածության շուրջ համախմբման նպատակ ունի:
Համամիտ լինելով Արամ Սարգսյանի մտքերին՝ Մկրտիչ Մինասյանն ասաց, որ ԲՀԿ առաջարկը նոր չէ, այս մասին խոսել են և՛ դաշնակները, և՛ «Ժառանգությունը» և էլի կուսակցություններ:
«Ես կարծում եմ, որ խորհրդարանն իր դերը պետք է ունենա, իսկ նախագահը՝ իր: Եթե ես ասեմ, որ դա քաղաքական նպատակներ չի հետապնդում՝ միամիտ կհնչի: Յուրաքանչյուր կուսակցություն իր քարոզչությամբ, իր քաղաքականությամբ է իր մարտավարությունը որոշում. եթե ԱԺ թվով երկրորդ կուսակցությունը որոշել է, որ ընտրություններից երեք-չորս ամիս առաջ սահմանադրության մեջ փոփոխություն մտցնելով տանի իր քաղաքականությունը՝ ուրեմն, նպատակ ունի կոնսոլիդացնելու քաղաքական ուժերին»,- կարծիք հայտնեց Մկրտիչ Մինասյանը:
