Ռուսական ВЗГЛЯД թերթի փոխանցմամբ՝ Հավլաբարում գտնվող Վրաստանի նախագահի նստավայրում անջատվել է արտաքին լուսավորությունը: Սաակաշվիլիի մամլո քարտուղար Մանանա Մանջգալաձեն հայտարարել է, որ դա կապված է Վրաստանի նախագահի աշխատակազմի բյուջետային ծախսերի կրճատման հետ:
Մանջգալաձեն հավելել է, որ անջատվել է արտաքին լուսավորության մեծ մասը, իսկ փոքր մասը թողնվել է անվտանգության ապահովման նպատակով: Նա ընդգծել է, որ նախագահական նստավայրի լուսավորությունը զարդարում էր քաղաքը, սակայն այժմ իրենք ստիպված են համաձայնել բյուջեից ֆինանսավորման կրճատման հետ: Ավելի վաղ նշվում էր, թե նախագահական նստավայրի տարեկան էլեկտրաէներգիայի վարձը կազմում է 800,000 լարի (484,000 դոլար):
Հիշեցնենք, որ 2013 թվականի Վրաստանի պետբյուջեում Սաակաշվիլիի պահուստային հիմնադրամի համար նախատեսված է 5 անգամ ավելի ցածր գումար՝ այս տարվա համեմատ, ինչը կազմում է 10 միլիոն լարի (մոտ 6 միլիոն դոլար): Միևնույն ժամանակ 14 անգամ կրճատվել է Վրաստանի Ազգային անվտանգության խորհրդի ֆինանսավորումը, ինչը 24,784,000 լարիի փոխարեն կազմել է 1.8 միլիոն լարի:
