ԵԺԿ-ն մայիսի 12-ին իր կայքում մի հետաքրքիր հայտարարություն է տեղադրել, որով գործընկեր կուսակցություններին կոչ է արվում դիտորդներ ուղարկել Ուկրաինայի՝ մայիսի 25-ին տեղի ունենալիք նախագահական ընտրություններին: Հայտարարությունն արել են մասնավորապես Եվրախորհրդարանի արտաքին հարցերով մշտական հանձնաժողովի նախագահ Էլմար Բրոկը և Լեհաստանի արտաքին գործերի նախարար Ռադոսլավ Սիկորսկին, որոնց կուսակցությունները ԵԺԿ անդամ են: Նրանք այդ հայտարարությամբ ԵԺԿ անդամ բոլոր կուսակցություններին, ԵՄ անդամ երկրների ազգային խորհրդարաններին և ԵԱՀԿ անդամ երկրներին կոչ են արել Ուկրաինայի նախագահական ընտրություններին հնարավորինս մեծ թվով դիտորդներ ուղարկել:
ԵԺԿ անդամ են նաև Հայաստանի խորհրդարանական երեք՝ իշխող Հանրապետական, ընդդիմադիր «Ժառանգություն» և վերջերս իրեն ընդդիմություն հռչակած «Օրինաց երկիր» կուսակցությունները: «Առաջին լրատվական»-ը փորձեց այս կուսակցություններից տեղեկանալ՝ նրանք կընդառաջե՞ն այս կոչին և դիտորդներ կուղարկե՞ն Ուկրաինայի նախագահական ընտրություններին: Հատկապես, որ այդ նույն հայտարարությամբ եվրոպացի այս պաշտոնյաները նաև նշում են, որ Ռուսաստանի նկատմամբ կիրառվող պատժամիջոցները պետք է ուղղված լինեն որոշում կայացնողների, նրանց ընտանիքի անդամների և որոշ ընկերությունների դեմ:
ՀՀԿ-ից ու ՕԵԿ-ից այս երկու օրերին հնարավոր չեղավ որևէ մեկնաբանություն ստանալ, նրանք անգամ տեղյակ չէին ԵԺԿ անդամ այդ պաշտոնյաների հայտարարության մասին: Իսկ «Ժառանգություն» կուսակցության քարտուղար Ստեփան Սաֆարյանը մեզ հետ հեռախոսազրույցում հայտնեց, որ իրենք դեռ այդ հարցը չեն քննարկել, և ինքը դեռ տեղյակ չէ՝ արդյոք իրենք դիտորդներ կուղարկե՞ն:
«Ուկրաինայի նախագահի թեկնածուների մեջ կան այնպիսի գործիչներ, որոնց կուսակցությունները ԵԺԿ անդամ են: Եվ ընդհանրապես՝ նոր իշխանություններին սատարում են այնպիսի կուսակցություններ, որոնք ԵԺԿ անդամ են: Հաշվի առնելով այն հանգամանքը, որ ԵԺԿ-ն քանիցս դատապարտել է Ուկրաինայում Ռուսաստանի ճնշումները և գործողությունները՝ միանգամայն սպասելի է, որ այդ կառույցը փորձելու է ապահովագրել տեղի ունենալիք ընտրությունները, որոնք Ռուսաստանը ցանկանում է կասկածի տակ դնել: Հետևաբար՝ բնական է, որ նման կոչ կլիներ: Կգնան հայաստանյան կուսակցությունները Ուկրաինա, թե չեն գնա՝ ժամանակը ցույց կտա: Բայց կարծում եմ, որ մի բան հստակ է. եթե ԵԽԽՎ-ն և ԵԱՀԿ-ն դիտորդական պատվիրակություններ ձևավորեն, անշուշտ Հայաստանը ներգրավված կլինի: Այս առումով մեր խորհրդարանը պատվիրակություններ չառաջադրելու տարբերակ չի ունենա: Խնդիրն այն է, որ որոշ եվրոպական երկրներ ՌԴ ճնշման տակ կարող են պատվիրակներ չառաջադրել ԵԽԽՎ-ում և ԵԱՀԿ-ում: Սա է պատճառը, որ ԵԺԿ-ն փորձում է իր անդամ կուսակցություններին հորդորել պատվիրակներ ներկայացնել»,- ասաց Ս. Սաֆարյանը:
Հայտարարության մեջ նաև նշված է, թե «մենք կողմ ենք Ուկրաինայի ապակենտրոնացմանը, բայց ոչ Բոսնիայի և Հերցեգովինայի կոնֆեդերացիայի օրինակով: Արդյո՞ք սա նշանակում է, որ Եվրոպայում արդեն հաշտվեցին այն իրողության հետ, որ Ուկրաինայի որոշ հատվածներ ու հատկապես Ղրիմը անջատվեցին կամ կանջատվեն այդ երկրից: «Չեմ կարծում, որ հաշտվել են, քանի որ պարզապես իրենց դիրքորոշումն են ամրագրել ու անցել առաջ»,- պատասխանեց Ս. Սաֆարյանը: