Ermenihaber.am լրատվական գործակալության փոխանցմամբ, երկրի արևելյան հատվածում գտնվող Բաթմանի բնակիչ հայազգի Ջևաթ Սինեթը դիմելու է Մարդու իրավունքների եվրոպական դատարան (ՄԻԵԴ):
Նշվում է, որ 2010 թվականի սեպտեմբերի 21-ին 32-ամյա Սինեթը հաշմանդամության գրքույկ ստանալու նպատակով դիմել է Բաթմանի սոցիալական ծառայությունների վարչություն, սակայն մերժում է ստացել իր ինքնության համար. «Դու հայ ես, քո ինքնության մեջ նշված է քրիստոնյա, դրա համար էլ մենք չենք կարող քեզ հատկացնել հաշմանդամության կարգ»:
Դրանից հետո Սինեթն այդպիսի ռասիստական մոտեցման համար դիմել է Բաթմանի հանրապետական դատախազություն, սակայն վերջինս անհետևանք է թողել Սինեթի այցը` գտնելով, որ տեղի ունեցածում որևէ հանցավոր բան չկա:
Այդ ամենից խիստ հիասթափված Սինեթը որոշել է դիմել ՄԻԵԴ:
Հիշեցնենք, որ 2010 թվականին ՄԻԵԴ-ում ստացված բողոքների քանակով Թուրքիան հայտնվել էր «պատվավոր» եռյակում: Նախորդ տարի ամենաշատ բողոքները ստացվել էին Ռուսաստանից` 40.295 բողոք, ապա գալիս էին Թուրքիան (15.206 բողոք) և Ռումինիան (11.950 բողոք):
Իսկ 2009 թվականին «առաջատար» քառյակում ընդգրկվել էին Ռուսաստանը, Թուրքիան, Ուկրաինան և Ռումինիան: