Կուբայի իշխանություններն ԱՄՆ-ին մեղադրել են Հավանայում ԱՄՆ դեսպանատան շենքում «քայքայիչ քաղաքականություն» վարելու համար։ Այս մասին հայտնում է Associated Press-ը:
Կուբացիներին վրդովվեցրել է այն, որ ամերիկյան ներկայացուցչությունում գործում են համացանցի հետ աշխատելու դասընթացներ և համացանցի անսահմանափակ հասանելիություն է տրամադրվում:
Կուբացիների կարծիքով` այսպիսով ամերիկացիները փորձում են «իրենց վարձկանների խմբից լուրջ ընդդիմադիր շարժում ստեղծել, սակայն դա նրանց չի հաջողվի»: Հավանան այս առիթով խոստացել է «բոլոր օրինական մեթոդներով» ամերիկացիներին ստիպել դադարեցնել այսպիսի գործունեությունը:
Դիտորդները կարծում են, որ այս կերպ Հավանան ուզում է ինչ-որ կերպ ազդել գալիք երեքշաբթի նշանակված ԱՄՆ նախագահական ընտրությունների ելքի վրա:
Մասնավորապես, Կուբայի` Օբամային քննադատելը կարող է նրան բերել Ֆլորիդայի փախստականների ձայները: Կուբան լքածներն այնքան չեն սիրում այդ երկրի ներկայիս վարչակարգը, որ Կուբայի իշանությունների քննադատությունն ընդունում են որպես քննադատվողի առավելություն:
ԱՄՆ-ը Կուբայի հայտարարության առիթով նշել է, որ դեսպանատանը ոչ մի ապօրինի բան չի արվում, իսկ համացանցի ուսուցումը չի կարելի անվանել «քայքայիչ քաղաքականություն»:
