Հայիթիի վարչապետ Լորան Լամոթը նոյեմբերի 1-ին հանեդս է եկել համաշխարհային հանրությանն ուղղված հայտարարությամբ, որտեղ ֆինանսական օգնություն է խնդրել «Սենդի» փոթորկի հետևանքները վերացնելու համար: Այս մասին հաղորդում է Agence France-Presse-ը:
Նախարարների կաբինետի նիստում, որը հեռարձակվել է տեղի հեռուստաալիքներից մեկով, վարչապետը խնդրել է համաշխարհային հանրությանը «աջակցել Հայիթիի ջանքերին ՝ կյանքեր ու գույք փրկելու համար»:
Նրա խոսքով՝ երկրի ազգային բյուջեն թույլ չի տալիս ինքնուրույն հաղթահարել աղետի հետևանքները:
Համաձայն նիստում ներկայացված տվյալների՝ գյուղատնտեսական ոլորտում կորուստները հասնում են 104 մլն դոլարի:
Երկրի առողջապահության նախարարը հայտարարել է, որ երկրում գրանցվել են խոլերայի հիվանդացության «բազմաթիվ դեպքեր»:
Նոյեմբերի 1-ին հաղորդվում էր, որ Վենեսուելայի իշխանությունները Հայիթիին առաջարկել են միջոցներ հատկացնել 5000 տների կառուցման համար, ինչպես նաև ուղարկել 3 ինքնաթիռ հումանիտար օգնություն:
«Սենդի» փոթորիկը, որն առաջացել է հոկտեմբերի 22-ին Կարիբյան ծովում, անցել է Կուբայով, Հայիթիով ու ԱՄՆ մի քանի նահանգներով, ներկայում շարժվում է Կանադայի ուղղությամբ:
Հայիթիում փոթորկի հետևանքով զոհվել է 52 մարդ, ևս 20 մարդ համարվում է անհետ կորած:
