«Կոռուպցիայի դեմ պայքարը մի քանի փուլ ունի, նախ՝ հասարակությունն է սկսում բարձրաձայնել, ապա միջազգային իրավական փաստաթղթեր են ի հայտ գալիս, և երրորդ փուլում արդեն ստեղծվում են ռազմավարական ծրագրեր պայքարի համար»,- «Արմնյուզ» հեռուստաընկերության «Բանաձև» հաղորդման եթերում ասել է «Հայաստանն ընդդեմ կոռուպցիայի» ծրագրի ղեկավար Կարեն Զադոյանը: Նա նշել է, որ միջոցառումների ծրագրեր Հայաստանում ընդունվել են 2001, 2003, 2008 թվականներին:
Կառավարության այսօրվա նիստում կոռուպցիայի թեմային անդրադարձել էր վարչապետ Տիգրան Սարգսյանը: Կարեն Զադոյանը նշել է, որ շաբաթ օրը վարչապետի նախագահությամբ տեղի է ունենալու հակակոռուպցիոն խորհրդի նիստ, և առաջին հարցը լինելու է պայքարի անարդյունավետությունը: Կոռուպցիայի դեմ պայքարը կարևորելով` բանախոսը նշել է. «Պետք է մի պահի սկսել, կապ չունի` ընտրությունների նախաշեմին է, թե դրանից հետո: Երբ պայքարը սկսվում է, ունի ձնագնդի էֆեկտ, և անհնար է կասեցնել»:
Կոռուպցիայի դեմ պայքարում առաջնահերթ է հասարակության մոտ անհանդուրժողականության ձևավորումը: «Պետք է հասարակությունը զգա կոռուպցիայի վտանգավորությունն ու պայքարի դրա դեմ: Սակայն հասարակական կազմակերպությունների միայնակ պայքարը անպտուղ կլինի: Պետք է աշխատանք տարվի ոչ միայն հանրութան, այլև պաշտոնյաների շրջանում: Մենք պետք է այնպիսի հասարակություն ստեղծենք, որը անհանդուրժող կլինի այդպիսի երևույթների նկատմամբ»,- ասել է «Հայաստանն ընդդեմ կոռուպցիայի» ծրագրի ղեկավարը: Ըստ նրա՝ այսօրվա հասարակությունը կա՛մ չի համարձակվում, կա՛մ չի ցանկանում կոռուպցիայի մասին հաղորդել: Դա համարում է իր պատվից ցածր, «գործ տալ»:
Կոռուպցիայի դեմ պայքարում Կարեն Զադոյանը կարևորել է նաև իրավախախտներին պատժելը և` ոչ միայն կարգապահական ու վարչական պատասխանատվությամբ, այլև` քրեական:
Կոռուպցիայի դեմ պայքարի ՄԱԿ-ի կոնվենցիային Հայաստանը միացել է ոչ ամբողջությամբ, դրույթների մի մասն ընդունել է անվերապահորեն, մի մասն էլ` որոշ վերապահումներով: Օրինակ` ապօրինի հարստացումը մեզանում քրեականացված չէ: Դա այն է, երբ պաշտոնյան չի կարողանում հիմնավորել իր հարստությունը: Խոսելով այս մասին` Կարեն Զադոյանն ասել է. «Այսօր հրամայական է, որ Հայաստանի իշխանությունները ցուցաբերեն քաղաքական կամք և քրեականացնեն դա: Կոռուպցիայի դեմ պայքարը կլինի շատ արդյունավետ»: Ընդ որում, օրենքը չի կարող ունենալ հետադարձ ուժ:
Բանախոսը կարևոր քայլ է համարել նաև պետական համապատասխան մարմնի ստեղծումը: Այնուհանդերձ, չի մոռացել նշել, որ եթե բարձր պաշտոնյան կռուպցիա թույլ չտա, ոչ մեկն էլ չի համարձակվի վերցնել:
