Այսօր հրավիրված մամուլի ասուլիսի ընթացքում «Նոր ժամանակներ» կուսակցության նախագահ Արամ Կարապետյանը, անդրադառնալով Սերժ Սարգսյանի վերջին ելույթներին, ասաց, թե Սերժ Սարգսյանը անձամբ է ընդունել, որ վիճակն օրհասական է:
Օգտվելով Ալիկ Սարգսյանի՝ «ժողովրդական ապստամբություն» արտահայտությունից, Ա. Կարապետյանը նկատեց, որ ապստամբությունը իսկապես մոտ է, ինչպես նաև լրագրողների միջոցով փոխանցեց քաղաքական գործիչներին, որ քաղաքականություն մտնելուց առաջ գրքեր կարդան` հասկանալու համար, թե ի՞նչ է հեղափոխությունը, ապստամբությունը և այլն:
Անցում կատարելով Սերժ Սարգսյանի ելույթին՝ նա նշեց, որ այդ ելույթում ընդդիմությանը ուղղված՝ երկխոսելու հրավեր չեղավ, սակայն ընդունեց ընդդիմության քննադատությունը և պատրաստակամություն հայտնեց այն քննարկելու:
Այսինքն ստացվում է՝ Սերժ Սարգսյանը ընդունում է, որ երկրում սոցիալ-տնտեսական վիճակը վատ է, բայց մնում է իշխանության: Ընդդիմության մեջ խելոք մարդիկ կան, հետևաբար դուք խելոք ելք առաջարկեք, մենք կքննարկենք, հետո ոնց ուզենք՝ կանենք:
«Կա ռեալ և վիրտուալ Հայաստան: Հանրապետականների ուղեղներում վիրտուալն է, ամեն ինչ լավ է, սակայն վերջին ելույթում Սերժ Սարգսյանը ընդունեց, որ իրավիճակը այնքան էլ լավ չէ, հետևաբար հիմա ՀՀԿ-ականները իրենց գնահատականներում, առաջնորդվելով Սերժ Սարգսյանի որակումներով, պետք է ընդունեն, որ իրավիճակն այնքան էլ լավ չէ»,- նշեց Արամ Կարապետյանը: