Բեյրութից Հալեպ ճանապարհին առևանգված հայերի ազատ արձակման պաշտոնական պահանջ դեռևս չի եղել. «Առաջին լրատվական»-ի հետ զրույցում ասաց Բերիո թեմի Ազգային առաջնորդարանի բանբեր Ժիրայր Ռայիսյանը: Նա նշեց, որ դեռևս լավ չեն հասկանում՝ ինչ է կատարվում, հնարավոր է` մի քանի ժամից ավելի հստակ տեղեկություններ լինեն:
«Աշխատանք է տարվում երկու ուղղությամբ: Պետք է իմանալ բոլոր առևանգվողների անունները, քանի որ նրանցից միայն մի քանիսի անուններն են հայտնի: Թեև տեսակցություն եղել է Հալեպ հասած ճամփորդների հետ, սակայն չի բացահայտվել բոլոր պատանդների անունները, քանի որ ճամփորդները բոլորի անունները չգիտեին: Աշխատում ենք նաև, որ ապահով վերադարձնենք առևանգվածներին»,- նկատեց Ժիրայր Ռայիսյանը:
Արձագանքելով այն տեղեկություններին, համաձայն որոնց` ապստամբները գերիների ազատ արձակման դիմաց պահանջում են հանձնել ձերբակալված 150 իրենց զինակիցներին, այլապես կսպանեն առևանգված 10 ուղևորներին՝ Ռայիսյանը հստակեցրեց, որ դրանք միայն խոսակցություններ են: Նրա հավաստմամբ՝ պաշտոնական ոչ մի տեղեկություն, պահանջ չկա:
Հարցին՝ ո՞ւմ դեմ են ուղղված վերջին օրերին սիրիահայ համայնքի նկատմամբ ոտնձգությունները և ի՞նչ նպատակ ունեն, պատասխանեց, որ չի կարող ասել, թե ում դեմ է ուղղված այս ոտնձգությունը` մինչև մեր ազգակիցների ապահով վերադարձը:
Հիշեցնենք, որ զինյալ ապստամբները Բեյրութից Հալեպ ուղևորվող քաղաքացիական ավտոբուսը ճանապարհին կանգնեցրել են և իջեցրել ուղևորներին։ Այնուհետև նրանք ազատ են արձակել կանանց, սակայն գերեվարել են, ընդհանուր հաշվով, 10 ուղևոր տղամարդու, որոնցից յոթը հայազգիներ են, ևս երեքը՝ քրիստոնյա արաբ: Յոթ հայերից հինգի անուններն արդեն հայտնի են՝ Լևոն Զեյթունյան, Կարո Փամփալյան, Արսեն Արոյան, հայր և որդի Բաշար և Ջորջ Ռաբաթներ:
