Արդեն երրորդ ամիսն է, ինչ Ոստիկանության անձնագրային և վիզաների վարչության Մարտունու անձնագրային բաժանմունքի շենքի առջև ամեն օր մարդկանց հոծ բազմություն է հավաքվում: Պատճառը սոցապ բնագավառում հայտարարված հերթական փոփոխությունն է:
Անապահով խավին հասցեագրված սոցիալական հատկացումների չարաշահումները բացառելու համար կառավարության որոշմամբ ընտանեկան նպաստ ստանալու իրավունք ունեցող քաղաքացիներին բնակչության պետռեգիստրում հաշվառման մասին տեղեկանքը այսուհետ տրամադրելու է ոչ թե ՏԻՄ-ը, այլ անձնագրային բաժանմունքը:
Մարդիկ դժգոհում են, որ մի կողմից սոցիալական ծառայությունների տարածքային գործակալության կողմից սահմանված ժամկետներն են սահմանափակ, մյուս կողմից էլ անձնագրային բաժանմունքում առկա հերթերն են ուշացման պատճառ դառնում:Չնայած որ Մարտունու անձնագրային բաժանմունքը խստացված գրաֆիկով է աշխատում` առավոտյան ժամը 9.00-ից մինչ կեսգիշեր:
Սակայն փաստն այն է, որ փոքրաթիվ աշխատակազմով այն չի հասցնում սպասարկել մարդկանց: Իսկ ստեղծված վիճակից դժգոհ մարդիկ խնդրի լուծման իրենց տարբերակներն են առաջարկում. Եթե հնարավոր չէ կրկին ընտանեկան նպաստի տեղեկանքների հատկացման գործառույթը տալ համայնքապետարաններին, ապա գոնե նախ դրանց ներկայացման վերջնաժամկետները երկարաձգվեն, ավելացնեն, թեկուզ ժամանակավորապես, անձնագրային բաժանմունքի աշխատողների թիվը, ըստ համայքների սպասարկեն կամ էլ լիազոր ներկայացուցիչներ գործուղեն գյուղեր` տեղում գործընթացը կազմակերպելու:
Բայց սա հարցի միայն մի կողմն է: Մարտունու տարածաշրջանը հայտնի է նաև արտագնա աշխատանքի մեկնողների մեծ թվով: Խոպանչիները արդեն սկսել են նախապատրաստել ճամպրուկները:Իսկ հիշյալ գործընթացը սկսվում է անձնագրից:
Ու ժամանակավորապես թեթեւացած հերթերը դարձյալ դարձան մարդաշատ եւ աղմկոտ: Ի դեպ, երբ աշխատանքային այցով ուրբաթ Սյունիքում գտնվող փոխվարչապետ Արմեն Գևորգյանին` մարզպետարանի պաշտոնյաները տեղեկացրին, որ Կապանի անձնագրային բաժնում հերթրեը շատ են ու մինչև մայիսի 30-ը չեն հասցնի աշակերտների հաշվառումը, փոխվարչապետը զարմացավ:
«Նման ահազանգ կա Մարտունիից միայն, ու արդեն գործընթացը սկսվել է: Մարտունու անձնագրային բաժանմունքում փոփոխություն կլինի, իսկ Կապանի մասին նոր եմ լսում, գրավոր դիմեք, կլուծենք հարցը»,-ասաց Ա. Գևորգյանը:
