Ինչպես «Առաջին լրատվական»-ի հետ զրույցում հայտնեց սիրիահայերին օժանդակող հանձնաժողովի անդամ Վարուժան Մասարաջյանը` կենտրոնը ստեղծվել է Սիրիայից Հայաստան վերադարձած հայերին օգնություն ցուցաբերելու նպատակով:
«Անձամբ ես 9 տարի է` վերադարձել եմ Հալեպից, և քանի դեռ Սիրիայում պատերազմը շարունակվում է, այժմ գնալով ավելի ու ավելի շատ հայեր են վերադառնալու: Նշեմ նաև, որ նրանց մեծ մասը հիմնականում ուզում է հաստատվել Հայաստանում: Մենք օգնում ենք վարձակալել բնակարաններ. սա առաջնային և ամենակարևոր խնդիրն է: Բայց միայն բնակարան վարձակալելը բավական չէ. մարդիկ այնտեղ աշխատանք ունեին, բիզնես, անհրաժեշտ է այստեղ այդ մարդկանց ապահովել նաև աշխատատեղերով: Դրանով էլ, կարծում եմ, պետությունը պետք է զբաղվի:
Մենք նաև որոշ գումար ենք տրամադրում, ինչպես նաև երիտասարդների ուսման հարցն ենք փորձում կարգավորել այստեղ: Ավելի քան 400 ընտանիք մեզ արդեն դիմել է: Այդ ընտանիքներից 95 տոկոսին մենք կարողացել ենք անհրաժեշտ օգնություն ցուցաբերել: 12 հոգուց բաղկացած հանձնաժողովը զանգերի և այցելությունների միջոցով գրառում է մարդկանց տվյալները, նաև այն, թե ինչի օգնության կարիք ունեն նրանք, և մի քանի օրվա ընթացքում փորձում ենք ցուցաբերել անհրաժեշտ օգնությունը»:
Ինչպես արդեն հայտնի է, Հայաստանում սիրիահայերի աջակցության մեկ այլ կազմակերպություն կա ՝ ՀՅԴ-ի նախաձեռնությամբ ստեղծված «Օգնիր եղբորդ» կազմակերպությունը:
Մեր խնդրանքով Վարուժան Մասարաջյանը խոսեց այս երկու կազմակերպությունների տարբերությունների մասին. «Միանշանակ մենք քաջալերում ենք ցանկացած կազմակերպություն, որն օգնություն է ցուցաբերում Սիրիային: «Օգնիր եղբորդ» կազմակերպության անդամների հետ երբևէ չենք զրուցել, բայց տեղյակ եմ, որ նրանք օգնություն՝ անհրաժեշտ դեղորայք և սնունդ են ուղարկում Հալեպ, իսկ մենք փորձում ենք օգնել այստեղ վերադարձած սիրիահայերին: Հետևաբար մրցակցության մասին ոչ մի խոսք լինել չի կարող: Մեզ աջակցում և ֆինանսավորում է Հայ բարեգործական հիմնադրամը: Մենք կուսակցությունների հետ ոչ մի առնչություն չունենք և այսքան ժամանակ օգնություն չենք ստացել, բայց եթե այն լինի, միայն կողջունենք և ուրախ կլինենք»:
Վարուժան Մասարաջյանի կարծիքով` Սիրիայում պատերազմը դեռ երկար կշարունակվի, հետևաբար այս կազմակերպությունը դեռ շատ անելիք ունի. «Եթե հրաշքներ չպատահեն, ապա ամենաքիչը երեք տարի պատերազմը կշարունակվի, Հայաստան վերադարձողների թիվն էլ գնալով կավելանա, մենք էլ՝ Հալեպից վերադարձածներս, կփորձենք հնարավորինս օգնել նրանց»,- եզրափակեց Վ. Մասարաջյանը:
