Կատարը բանակցություններ է վարում եվրոպական 7 բանկերում մասնաբաժին գնելու ուղղությամբ: Այս մասին հաղորդում է Al-Arabiya-ն՝ վկայակոչելով իր անանուն աղբյուրները: Առայժմ չի հաղորդվում, թե որ բանկերի մասին է խոսքը:
Կատարն ակտիվորեն ներդրումներ է կատարում Եվրոպայում իր ներդրումային հիմնադրամի միջոցով, որտեղ գումարներ են մտնում պետական բյուջեի պրոֆիցիտից: Վերջին տարիներին այդ ցուցանիշը նավթի բարձր գների ֆոնին կազմում է ավելի քան 16 մլրդ դոլար: Միաժամանակ մի շարք եվրոպական ընկերություններ և բանկեր լիկվիդայնության դեֆիցիտ ունեն, որն առաջացել է սկզբում ֆինանսական, իսկ հետո պարտքային ճգնաժամի հետևանքով:
Արդյունքում Կատարն արդեն խոշոր ներդրող է հանդիսանում ֆրանսիական Total-ում, բրիտանա-հոլանդական Shell-ում, ՊՍԺ ֆուտբոլային ակումբում, Լոնդոնի Harrods խանութում և այլն: Բացի այդ, Կատարը 5 մլրդ դոլար է ներդրել Չինաստանի ֆոնդային շուկայում: Ընդհանուր առմամբ, այդ երկրի արտասահմանյան ներդրումները 2011թ. տվյալներով կազմել են ավելի քան 6 մլրդ դոլար:
