Երեկ, երբ Աժ-ում քննարկվում էր Հայաստանում նվազագույն աշխատավարձը 2 հազար 500 դրամով ավելացնելու մասին օրինագիծը, որի արդյունքում նվազագույն աշխատավարձը կկազմի 35 հազար դրամ, «Հրապարակ»-ը փորձեց Աժ ՀՀԿ-ական պատգամավորներից պարզել, թե քանի օր կապրեին 35 հազար դրամով: ՀՀԿ-ականները, սակայն, հարցը լսելով` կամ արագ հեռանում էին, կամ, հումորի վերածելով, նետում, թե կփորձեն, նոր կասեն: ՄԻԱԿ ներկայացուցիչ Լևոն Մարտիրոսյանը, ով Սերժ Սարգսյանի փեսա Միքայել Մինասյանի ընկերներից է և բավականին ապահովված, հարցը լսելով` նախ քմծիծաղ տվեց, ապա, երկար դադար վերցնելուց հետո, պատասխանեց.
– Դժվարանում եմ ասել, իսկապես դժվարանում եմ:
– Մոտավորապես:
– Չգիտեմ, պիտի մտածեմ, վաղը որ գաք, ես այստեղ եմ` կասեմ:
– Մեկ ամիս կապրե՞ք:
– Շաաատ դժվար:
– Կապրե՞ք մեկ ամիս:
– …Ավելի լավ է 35 հազար դոլարով ապրեմ:
– Այսինքն Դուք ևս խելամիտ չեք համարում մեր պայմաններում այդ գումարի չափը:
– Դե, բարձրացնում է կառավարությունը, խոստացել է և բարձրացնում է:
– Այս պահի դրությամբ, մեր պայմանների առկա գնաճի և այլնի, և այլնի…
– Մենք, որ շատ հարուստ երկիր չենք, ոչ մեկի համար գաղտնիք չէ, կառավարությունն ի՞նչ անի:
– Բայց, ի տարբերություն շատ երկրների, այստեղ անտրամաբանական թանկացումներ են լինում, և մենք շատ թանկ երկիր ենք:
– Այո, խնդիրներ կան:
Մեկ այլ ՀՀԿ-ական` փուչիկագործ Կարեն Ավագյանից թերթը հետաքրքրվեց, թե արդյոք ճիշտ չէ՞ր լինի բյուջեից հատկացումները սահմանափակել, ասել է թե` բյուջեն խնայել, ինչպես իրենք արեցին փուչիկներ գնելիս, փոխարենը բարձրացնել նվազագույն աշխատավարձը: Ավագյանը վրդովվեց, նեղսրտեց, թե ինքը հազար անգամ խոսել է այդ մասին և ասել, որ փուչիկների գործով ինքը որևէ պատասխանատվություն չի կրում:
– Լավ, Դուք 35 հազար դրամով քանի՞ օր կապրեք:
– Ես ուզում եմ ասել, որ 35 հազարը նվազագույն աշխատավարձն է, և դրանից ներքև անթույլատրելի է, բայց դա չի նշանակում, որ 35 հազար դրամ է լինելու այդ աշխատավարձը:
– Նախարարն էլ հավաստեց, որ շատերն են այդ աշխատավարձը ստանում:
– Այսինքն Դուք մտածում եք, որ մեկ դրույքով հիմնական ստավկա աշխատող մարդն այդքան, թե համատեղ… Իրականում մեր մինիմալ աշխատավարձը տարիների ընթացքում որոշակի աճ է ապրում, բնականաբար, չլուծելով այն բոլոր խնդիրները, որը որ կա, բայց այդ աճը չնկատելը մեկ ուրիշ ծայրահեղություն է: Եթե մենք խոսում ենք բյուջեի այսօրվա հնարավորությունների մասին, իհարկե, սա բարձրացում կարելի է համարել:
– Լավ, Դուք նույն «հիմնավորումներն» եք ներկայացնելու, ինչ մյուս ՀՀԿ-ականներն են անում: Բայց խնդրում եմ հստակ պատասխանել` 35 հազար դրամով Դուք քանի՞ օր կկարողանաք ապրել:
– Չեմ փորձել, փորձեմ` ասեմ:
– Մոտավորապես… կամ գուցե մի քանի կամ մի ժամ:
– Չէ, ես մեկ ժամում հաստատ դժվարանամ ծախսել այդքան:
– Բյուջեի հնարավորությունից եք խոսում, բայց նույն այդ բյուջեից պետական պաշտոնյաներին հատկացված ծառայողական մեքենաները մի քանի միլիոն են կազմում:
– …Ներկայացուցչական ծախսերը չպետք է խառնել այլ ծախսերի հետ: Դուք ինքներդ շատ վատ կզգաք, երբ որոշակի քաղաքական քննարկումների ժամանակ մեր շենքային և աշխատանքային պայմանները չհամապատասխանեն:
– Կոստյո՞ւմն է Ձեզ գեղեցկացնում, կամ` ի՞նչ է նշանակում մեքենաներն եք ցուցադրում:
– Ոչ, բայց եթե պատկերացնեք… քո ներկայացուցչական վիճակը չի համապատասխանում այն քննարկումներին, այն գործընթացներին, որի մեջ դու կաս:
– Իսկ այդ քննարկումներում Դուք Ձեզ որքա՞ն ամուր և արժանապատիվ եք զգում` իմանալով, որ հետևում սոված ժողովուրդ կա:
– Չէ, Դուք ծայրահեղացնում եք հիմա, իհարկե, կան խնդիրներ, հենց մենք ենք բարձրաձայնում և փորձում լուծել խնդիրները: Բոլոր հատկացումներն ու խնդիրները կարևոր են, և չպետք է դա խառնել:
