Թուրքիայի քաղաքացիների մեծ մասը դեմ է սիրիական հակամարտությանը ցանկացած միջամտություն ցուցաբերելուն` չնայած Անկարայի և Դամասկոսի միջև եղած լարվածությանը։ Այս մասին հայտնում է Hürriyet Daily News թուրքական տեղեկատվական գործակալությունը` հղում անելով Տնտեսության և արտաքին քաղաքականության կենտրոնի պատվերով TNS-Turkey կազմակերպության վերջերս անցկացրած հարցման արդյունքներին:
«Թուրքիան ի՞նչ դեր պետք է խաղա Սիրիայում Բաշար Ասադի վարչակարգի տապալումից հետո» հարցին մասնակիցների 51 %-ը պատասխանել է, որ Թուրքիան չպետք է խառնվի Սիրիայի գործերին:
Հարցվածների 18 %-ը համարում է, որ Թուրքիան պետք է Սիրիայի հարցում հանդես գա որպես հաշտարար, 7 %-ը նշել է, որ Թուրքիան պետք է Սիրիային ֆինանսական օգնություն տրամադրի: Հարցմանը մասնակցել է 1 500 մարդ՝ 18 նահանգներից:
Հարցում է անցկացվել նաև 266 արտասահմանցի քաղաքագետների շրջանում: Այս հարցման արդյունքներով` փորձագետների 36 %-ը կողմ է Թուրքիայի միջնորդությանը, 26 %-ը հակառակ կարծիք ունի:
