Երեկ խորհրդարանը 75 «կողմ» և 4 «դեմ» ձայների հարաբերակցությամբ, փակ, գաղտնի քվեարկությամբ, ԲՀԿ-ական պատգամավոր Մարտուն Գրիգորյանին ընտրեց Աժ գյուղատնտեսության մշտական հանձնաժողովի նախագահ: Հիշեցնենք, նախկինում սույն հանձնաժողովի նախագահը Գյումրիի ներկայիս քաղաքապետ, ԲՀԿ-ական Սամվել Բալասանյանն էր:
Մինչ հաշվիչ հանձնաժողովը կհաշվեր Գրիգորյանին տրված ձայները, «Հայկական ժամանակը» մի քանի հարց ուղղեց պատգամավորին:
– Պարոն Գրիգորյան, մեր վերջին զրույցի ժամանակ ասել էիք, որ պատրաստ եք առաջադրվել Գյումրիի քաղաքապետի թեկնածու և կջախջախեք Վարդան Ղուկասյանին: Տեղեկություններ կան, որ ձեզ թույլ չտվեցին առաջադրվել, ՀՀԿ-ն ու ԲՀԿ-ն համաձայնության եկան Բալասանյանի թեկնածության շուրջ: Դրանից հետո խոսվում էր, որ որևէ թեկնածու պետք է առաջադրեք Գյումրիի թիվ 35 ընտրատարածքում: Բայց այնտեղ էլ ՀՀԿ-ական թեկնածուի դեմ որևէ մեկին չառաջադրեցիք, պատճառը ո՞րն է, ինչո՞ւ թեկնածու չառաջադրեցիք:
– Այո, ես հայտարարել եմ, որ պատրաստ եմ, եթե մեր կուսակցությունում որոշում լինի, քաղաքապետի թեկնածու առաջադրվել և ջախջախիչ հաղթանակ տանել: Ես իմ ասածի տերն եմ եղել, և դա ուղղակի խոսքեր չեն եղել, ես դա ապացուցել եմ ընտրություններով և վստահ եմ եղել: Իսկ ինչ մնում է, թե ինչու չառաջադրվեցի, այդ ընթացքում պարոն Ծառուկյանի հետ քննարկումներ են եղել, քննարկվել են բազմաթիվ խնդիրներ, և ես որոշել ա այս անգամ չառաջադրել իմ թեկնածությունը քաղաքապետի ընտրություններում, մնալ Աժ-ում: Իսկ ինչ մնում է 35 ԸՏ-ին, ես ասել եմ` եթե ԲՀԿ-ն որոշի այդտեղ թեկնածու առաջադրել, մենք պատրաստ ենք մեր թեկնածուին սատարել և, բնականաբար, հաղթանակ ապահովել: Այսօրվա դրությամբ կուսակցությունը չորոշեց այդ ԸՏ-ում թեկնածու առաջադրել:
– Այնպիսի տպավորություն է, որ բարտեր եղավ ՀՀԿ-ի ու ԲՀԿ-ի միջև, քաղաքապետի պաշտոնը` ԲՀԿին, ընտրատարածքը` ՀՀԿ-ին:
– Չէ, դա ավելի շատ, իմ կարծիքով, պատահականություն է, ոչ դիտավորություն, քանի որ ՀՀԿ-ն գոնե պատգամավորի մանդատի պակաս չուներ, որ քաղաքապետի տեղը փոխեր պատգամավորի մանդատով:
– Ինչո՞ւ, ավել մանդատը կխանգարե՞ր:
– Չէր խանգարի, բայց այսօր պատգամավորի մանդատի խնդիր եթե չունեն, ես չեմ կարծում, որ կարող են այդ մանդատը փոխարինել քաղաքապետի տեղով: Դա ավելի խելքին մոտ տարբերակ կարող էր լինել, եթե այդ մի մանդատը ՀՀԿ-ականների համար կարևոր լիներ:
– Տեղեկություններ կան, որ Աժ գյուղատնտեսության հանձնաժողովի նախագահի պաշտոնը ձեզ տվեցին ընտրություններին մասնակցել թույլ չտալու դիմաց, որպես փոխհատուցում կամ որպես մխիթարանք:
– Բացարձակ փոխհատուցման խնդիր չկա, ոչ մի մխիթարանքի խնդիր չկա: Պարոն Ծառուկյանի հետ քննարկել ենք, քննարկման արդյունքում որոշել եմ չառաջադրվել: Ես և ԲՀԿ-ն մայիսի 6-ին 34-րդ ընտրատարածքում փայլուն հաղթանակ ենք տարել, այս պաշտոնն էլ ընդունենք փոխհատուցում դրան:
