Էրեբունի-Երևան տոնակատարության շրջանակում իրականացված «Մեր հանճարները մեր կողքին են» քաղաքապետարանի նախաձեռնությամբ մայրաքաղաքում տեղադրված հայ մեծանուն արվեստագետների արձանները առաջիկայում, որպես նվեր կփոխանցվեն համանուն տուն-թանգարաններին:
Երևանի քաղաքապետարանի տեղեկատվության և հասարակայնության հետ կապերի վարչությունից «Առաջին լրատվական»-ին հայտնում են, որ հերթական խորհրդակցության ժամանակ անդրադառնալով մանկապարտեզներում երեխաների սննդի մշտական վերահսկողությանը, քաղաքապետ Տարոն Մարգարյանը հանձնարարել է արդյունքների մասին պարբերաբար զեկուցել:
«Ցանկացած խախտման դեպքում ձեռնարկեք համապատասխան քայլեր: Բացի այդ, հետևեք նաև, որպեսզի այս գործընթացում նախակրթարան հաճախող երեխաների ծնողների անմիջական մասնակցությունը լինի շարունակական»,-նշել է քաղաքապետը:
«Օգնիր դպրոցիդ» և «Օգնիր մանկապարտեզիդ» ծրագրերին աջակցելու նպատակով գումարների փոխանցման պարտադրումը, ինչպես նաև դպրոցներում ուսումնաօժանդակ իրերի վաճառքի դեպքերը բացառելու մասով կրթության վարչության պետը զեկուցել է, որ ուսումնական հաստատությունների պատասխանատուների հետ կազմակերպվում են պարբերական խորհրդակցություններ և ամենօրյա հետևողական աշխատանք է տարվում այդ ուղղությամբ:
