ԱՄՆ պետքարտուղարի օգնականի տեղակալ Էրիկ Ռուբինն այսօր հայ-ամերիկյան տնտեսական միջկառավարական հանձնաժողովի նիստից հետո լրագրողների հետ ճեպազրույցում հայտարարեց, որ հայկական կողմի հետ քննարկել են հետագա քայլերը՝ առևտուրը և ներդրումները խորացնելու նպատակով։ «Խոսել ենք բաց. արդյունավետ, հետաքրքիր խոսակցություն է ծավալվել, թե ինչպես կարող ենք մեծացնել ներդրումները, ինչպես կարող ենք ավելացնել աշխատատեղերը»,– ասել է Ռուբինը։ Նրա հավաստմամբ՝ ամերիկյան կողմը ցանկություն ունի խթանել ներդրումները Հայաստանում։
Միաժամանակ նա դժվարացավ ՀՀ-ում ԱՄՆ ներդրումների հստակ թիվ նշել՝ շեշտելով, որ «միտումները դրական են», բացի 2008 թ-ից, որը բացասական ազդեցություն ունեցավ ԱՄՆ տնտեսության վրա։ Նա համակարծիք է այն տեսակետի հետ, որ ՀՀ–ի և ԱՄՆ–ի միջև առևտրի ծավալները բավարար չեն, որ կարող են ավելի շատ ներդրումներ լինել ԱՄՆ–ի կողմից. «Սա ընդունում ենք որպես հանձնարարություն»։
Անդրադառնալով օրերս տեղի ունեցած հայ-ռուսական համաժողովին՝ Ռուբինը տեսակետ հայտնեց, որ իրենք ուզում են, որ ՀՀ առևտուրն աճի բոլոր երկրների հետ, և չեն կարծում, որ ՌԴ–ն կամ ԱՄՆ–ը մրցելու խնդիր ունեն, և մեկը կարող է պարտվող լինել։ Ըստ նրա՝ զարմանալի չէ, որ ՀՀ-ի առևտրի ծավալները ՌԴ–ի հետ ավելի մեծ են, քանի որ դա կապված է երկու երկրների աշխարհագրական դիրքի հետ. «Այս առումով չենք նախանձում ռուսական կողմին»։
Ռուբինը հրաժարվեց մեկնաբանել «Գլոբալ Գոլդ Մայնինգի» և Վարդան Այվազյանի հետ կապված իրադարձությունները՝ նշելով, որ այս հանդիպման ընացքում առանձին գործեր և դրվագներ չեն քննարկվել, այլ ավելի շատ համակարգային հարցեր են քննարկվել։
Խոսելով այն մասին, թե որքանով է նպաստում արբիտրաժի որոշումների չկատարելը հայ-ամերիկյան տնտեսական համագործակցության զարգացման վրա՝ Ռուբինը հայտարարեց, որ իրենց համար ընդունելի չէ դատական համակարգի գործերին անդրադառնալը, սակայն կարևորեց, որ դատական համակարգի ազատ ու թափանցիկ դերը ոչ միայն բաց հասարկության, այլև տնտեսության համար կարևոր է։ Նրա խոսքերով՝ ՀՀ գործընկերության հետ 20 տարիների ընթացքում իրենք աշխատել են ՀՀ դատական համակարգի բարեփոխումների ուղղությամբ, որ համակարգը լինի բաց ու թափանցիկ։
