Վենեսուելայի նախագահ Ուգո Չավեսն առաջարկել է ԱՄՆ նախկին նախագահ Ջիմի Քարտերին ընդգրկել իր առաջարկով ստեղծվելիք հանձնաժողովում, որը պետք է միջնորդական առաքելություն իրականացնի լիբիական ճգնաժամը հաղթահարելու համար:
«Քարտերը լիովին կարող է տեղ զբաղեցնել Լիբիայում իրավիճակի կարգավորման համար ստեղծվելիք միջազգային հանձնաժողովում», ուրբաթ օրը Կարակասում հայտարարել է Չավեսը: Նա նաև ավելացրել է, որ Ջիմի Քարտերը կարող է դա լավագույնս իրականացնել, քանի որ նա դրական դեր է խաղացել նաև Վենեսուելայում 2002թ. ճգնաժամը հաղթահարելու հարցում:
Հիշեցնենք, որ Վենեսուելայի նախագահի առաջարկած հանձնաժողովի ստեղծման հնարավորությունը ԱՄՆ-ն ու Ֆրանսիան արդեն մերժել են, թեպետ այդ առաջարկը հավանություն է ստացել թե՛ Մուամար Քադաֆիի, թե՛ Արաբական երկրների լիգա կազմակերպության կողմից: