Շվեդիայում աղմկալի սկանդալ է սկսվել` կապված հայտնի գեղանկարիչ, լուսանկարիչ Էլիզաբեթ Օլսոն Վալինի աշխատանքի հետ: Աշխատանքը ներկայացված է Բելգրադի ցուցադրություններից մեկում: Կինը Շվեդիայի թագավոր Կարլ XVI Գուստավին պատկերել է մերկ Կամիլա Հենեմարկի (երգչուհի, մերկապարուհի, մոդել) հետ պիցցա ուտելիս: Նկարում առավել վիրավորական է Շվեդիայի թագուհու պատկերումը, որտեղ երևում է, թե ինչպես է նա ծնկաչոք հատակից մաքրում սվաստիկայի նկարը:
«Համբերության սահմաններ գոյություն ունեն: Այս աշխատանքը վիրավորական է և վնասակար, այն վատ մտադրություններ է առաջացնում»,- հայտնել է պալատի ներկայացուցիչը պաշտոնական հաղորդագրությունում:
Խիզախ նկարչուհին չի պատրաստվում ներողություն խնդրել իր ստեղծագործության համար: Նրա խոսքով՝ թագավորը երկար ժամանակ է անցկացրել կասկածելի հաստատություններում: Վալինը հայտնել է, որ ստեղծագործելիս ոգեշնչվել է 2010-ին լույս տեսած «Կարլ XVI Գուստավ՝ ակամայից միապետ» գրքից, որը պատմում է թագավորի՝ երիտասարդության տարիների մեղքերի մասին:
Կինը մատնանշում է նաև Շվեդիայում թույլ ձևավորված երգիծական մշակույթը: Շվեդիայում երգիծանքի զարգացմանը նպաստելու համար շվեդական Tiden հրատարակությունը որոշել է տպագրել այդ նկարը:
