Կառավարության դիմաց երեկ տեղի ունեցածը ԱԺ ՀՅԴ խմբակցության պատգամավոր Լիլիթ Գալստյանը որակեց որպես մեր իրականության մեջ տիրող ցինիկության արդյունք:
Լրագրողների հետ հանդիպման ժամանակ Գալստյանը նշեց, որ ցինիկությունը հասել է այն աստիճանի, որ ոստիկանությունը ձեռք է բարձրացնում անգամ պատգամավորի վրա:
Լիլիթ Գալստյանի խոսքերով, հստակ է, որ այսօր իրավական համակարգը ծառայում է ոչ թե օրենքով իր վրա դրված պարտականություններին, այլ այդ պահի իշխանություններին: Ըստ Գալստյանի՝ կատարվածն ուղղակի վիրավորական է ցանկացած քաղաքացու և իշխանության համար և իշխանությունների որակի արտահայտությունն է: Նա նշեց, որ ՀՅԴ-ն դատապարտում է կատարվածը և պահանջում իրավական գնահատական:
ԱԺ ՀՀԿ խմբակցության պատգամավոր Հովհաննես Սահակյանը ևս դատապարտում է կառավարության առջև տեղի ունեցածը:
Նա նշեց, որ պատգամավորները պետք է հարգանքով վերաբերվեին ոստիկաններին, իսկ ոստիկաններն էլ պետք է ավելի պատրաստված լինեին:
Սահակյանի խոսքերով, երեկ «Ժառանգությունը» փորձում էր ցույց տալ, որ իրենք իսկապես ակտիվ են, այդուամենայնիվ, ըստ Սահակյանի, «Ժառանգությունը» շատ ճիշտ է վարվել, և դրա հետ կապված սկսվել է դատական գործընթաց: